「政治正確」乃係近年全球「主旋律」之一，而且唔單止係要維持形象嘅公眾人物或企業，就連作為普通人嘅大家，於生活上、職場上有時都要考慮到「政治正確」。而近日一個研究就發現，員工於職場上維持「政治正確」，其實會加重員工們嘅認知疲乏，更可能會影響家庭生活。

來自美國德州A&M大學商業管理系嘅教授Joel Koopman早前與其團隊進行一個研究，希望知道「職場政治正確 (其定義為：因考慮到其他人的感受而修改、壓制、忍受語言或行為)」對於員工嘅心理影響。佢哋先後以大學職員、普通全職打工仔以及大學生作為對象，要求佢哋紀錄自己於職場上因為要「政治正確」而做嘅行為或者發言 (大學生們係隨機接受一個需要或不需要政治正確嘅任務)，再紀錄佢哋於完成工作後嘅認知疲乏 (cognitive resource depletion) 程度。

結果就發現，無論係自發地政治正確又或被指示地政治正確，都會令研究對象感到更加疲乏。其中以大學職員為對象嘅調查中，更發現職員們嘅伴侶認為「政治正確」嘅另一半，放工後返到屋企會更易怒，亦更抽離家庭生活。

團隊另外進行咗一個調查，發現「他人導向 (Other Oriented，簡單講即係會為其他人著想)」嘅人更傾向有政治正確行為，表明好多時「政治正確」係出自良善、唔想其他人唔開心嘅友好目的。而團隊亦強調，研究絕對唔係想叫大家唔好做政治正確嘅行為，而係希望大眾以及企業知道，政治正確行為嘅背後其實係大量「自制」，而自制係會攰嘅。

另一邊廂，佢哋亦期望未來會有其他關於「政治正確行為嘅好處」嘅研究，以便大家衡量。

資料來源：Walking on eggshells: A self-control perspective on workplace political correctness