日本女電競選手たぬかな，去年因為嘲諷「矮人冇人權」而被封殺，今年初復出後又指「矮人小器又暴燥」再次炎上。不過近日一個研究就發現，原來身高真係同一個人嘅心理健康有關，而且矮人的確會更傾向擁有「黑暗人格」。所以某程度上たぬかな又唔算錯！

所謂嘅「黑暗人格」包括自戀、馬基雅維利主義以及心理病態，具體而言就即係自私、自負、缺乏同情心及道德、反社會行為、衝動等一系列負面特質。而是次研究就係試圖證實「黑暗人格」係個體面對地位/伴侶/生存競爭嘅解決辦法之一。

研究團隊招募咗367名美國成年人，並要求佢哋完成一份評測其「黑間人格三角」嘅問卷，並紀錄佢哋嘅實際身高，以至對於「我希望我可以高啲」、「我對於自己的身高感到滿足」等陳述嘅同意程度。以得出「黑暗人格程度」、「實際身高」以及「對於身高的滿足度」之間嘅關係。

圖片：《Spider-Man: Far From Home》

結果就發現，「實際身高」及「身高滿足度」與「黑暗人格程度」都係呈反比，即係身高越低，或者對於身高越唔滿足，個體嘅黑暗人格程度就越高，如果係本身唔高、仲要唔滿意自己身高，雙重影響下黑暗人格程度就更加高。研究團隊表示，身型較矮嘅人，難以單靠體型就令他人產生「敬畏」嘅感覺，所以為咗彌補呢個弱點，佢哋就會專追求「心理層面嘅敬畏」，例如男生會要求對方表示尊敬、要求佔有更多資源；女性就會嘗試扮演弱者以尋求保護等。

特別要提嘅係，雖然對於男性黎講，「身高」與「自戀」之間嘅反比，會比女性更加強；但於另外兩項「黑暗人格」當中，性別其實冇明顯分別。換言之，唔係「矮仔就傾向有黑暗人格」，而係「矮人都會傾向有黑暗人格」。

資料來源：The Napoleon complex, revisited: Those high on the Dark Triad traits are dissatisfied with their height and are short