過去有好多關於性愛嘅研究，都證實做愛對於人體有實際益處，但就較少有關於心理上益處嘅相關研究。不過近日中國嘅一個研究就利用美國普查數據，發現做愛原來能夠有效降低患上抑鬱症嘅機率，甚至仲計咗個「最佳次數」出黎。以後大家又多個理由做愛啦！

來自中國深圳大學第一附屬醫院以及汕頭大學醫學院嘅研究團隊，利用美國國家健康營養調查（NHANES）自2005至2016年收集嘅美國國民健康相關數據進行二次分析。團隊先從資料中搵出近1.5萬名同時有回答性愛頻密度以及做過抑鬱症評分調查嘅樣本，再利用統計學分析兩者之間嘅關係，結果發現「每週做愛至少一次」嘅人，患上抑鬱症嘅機率比起「每月做愛不足一次」嘅人低24%；另一邊廂，「每月做愛至少一次，但不足一週一次」嘅人患上抑鬱症嘅機率亦低23%，證明不論年齡、性別、收入、婚姻狀態，只要做愛做得夠多，的確能夠減少患上抑鬱症嘅機率。

團隊進一步利用統計學方法，試圖測量「做愛次數」與「降低患上抑鬱症機率」之間嘅關係是否線性，亦即是否「做得越多，機率越低」，結果就發現兩者存在「飽和效應」，換言之做愛次數去到某個數字之後，降低患上抑鬱症機率嘅效果就會大減。咁呢個數字係幾多呢？團隊計算出嘅係一年52至103次，亦即係大約一週一到兩次之間。如果大家都想利用做愛黎降低患上抑鬱症機率，就可以用呢個數字黎做目標啦。

資料來源：Optimal sexual frequency may exist and help mitigate depression odds in young and middle-aged U.S. citizens: A cross-sectional study