李羅渣 - 年青教頭起革命

文：李羅渣　　
POSTED ON 03 May 2017


一講四字頭未到就大放異彩嘅領隊，你可能會諗起韋拿斯保亞斯，不過由今季起你就要記多個名，佢就係賀芬咸主帥拿格斯文。佢帶領賀芬咸喺星期日主場小勝法蘭克福1-0之後就上到德甲第三名，同時鎖定來季參加歐聯嘅資格。至於可唔可以坐穩第三下季直闖歐聯分組賽，嚟緊三賽聯賽就要同多蒙特周旋到底。而雙方就係喺星期六碰頭。

拿格斯文嘅故事同其他年青教頭相近，一樣曾經係足球員，但係因為傷患好快就結束球員生涯。拿格斯文本身1860慕尼黑青年軍成員，司職中堅嘅佢20歲就因為嚴重膝傷要結束球員生涯。不過換個位置，仍然可以喺足球圈生存。21歲嘅時候佢就喺奧格斯堡開始佢教練生涯，到2010年成為賀芬咸青年軍教練，2016年因為時任領隊史提芬斯心律不整而請辭，拿格斯文就正式上任，成為當時排緊第17位嘅賀芬咸一隊領隊，最後以第15位成功護級完成球季。

成日話而家球員物質豐盛，領隊想行以前嗰套高壓統治球隊嘅執教方法已經唔work。而拿格斯文就無呢個問題，佢自己話教波有30%係戰術，70%靠社交能力，最重要係搵到球員嘅動力。拿格斯文管理球隊講求關係融合，的確可以勉卻唔少衝突，令球隊專心一致應付比賽，對於提升球隊戰術執行力都好有幫助。

近年足球圈興起用年青領隊，英格蘭有克利文，就算香港都有文彼德、陳婉婷。你話年長教練係咪一定有經驗，後生一定太嫩，踢波叻又一定教波好？睇實際情況就知年紀、經驗同做領隊都無關係，好似施丹同馬勒當拿咁，大家都係好波之人，但講到教波，兩個人就差好遠，除咗經驗同戰術運用，有時好似拿格斯文咁講，處理隊中人際關係先係成功領隊嘅重要關鍵。
李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。