【見好就收...購】皇馬有意出價5000萬鎊收購車路士中場簡迪

文：MenClub Mr.波特　　圖：互聯網
POSTED ON 23 May 2017


前晚係英超聯賽嘅收咧日，其中已經奪得冠軍嘅車路士主場以5：1擊敗新特蘭，以一場大勝完美收咧。

今季車路士能夠奪得聯賽冠軍，第一功臣當然係領隊干地，雖然今季只係佢喺車路士嘅第一季，但係佢已經可以令球隊陣容變得相當平衡，同時球隊嘅攻擊力亦繼績保持係聯盟頂級之列。當然，你可能會認為車路士今季因為唔需要分心歐洲賽先可以交出咁好嘅成績，係嘅呢個係其中一個原因，但係無可否認今屆嘅車路士確實係比之前一季踢得更具活力，特別係今季新加盟嘅中場簡迪更加係重中之重。

去年夏天，車路士從冠軍李斯特城收購中場簡迪，當時嘅轉會費為3000萬鎊，最終一加盟佢就成為車路士中場嘅骨幹，掌管住球隊嘅攻守平衡。

喺今季英超，26歲嘅簡迪一共為車路士上陣左48場比賽攻入2球及交出2次助攻，其中喺英超則上陣35場交出1個入球1次助攻。單看入球及助攻數字並唔可以明白簡迪對於車路士嘅重要性，因為佢做得最好嘅就係中場後場嘅防守，佢嘅攔截成為球隊第一道防線，令球隊今季喺英超只係失左33球，排名聯賽第3位。

而簡迪喺尋日獲得英超最佳球員獎項，咁樣佢就成功獲得今季英超所有個人大獎，其中除左英超最佳球員外，佢較早前亦已經得到PFA年度最佳球員同埋FWA年度最佳球員，再加埋英超冠軍，簡迪真係已經贏盡英超所有榮譽。

呢位法國球星連續兩季都帶領佢嘅球隊拎到英超冠軍，證明佢擁有絕對嘅能力去踢歐洲一眾豪門。眼見呢位法國球星嘅表現出色，岩岩拎到西甲冠軍嘅皇馬就對佢虎視眈眈啦。作為同鄉，皇馬領隊施丹已經同球隊管理層表達了想收購呢位中場嘅意願。

最新嘅消息指，皇馬將會配合施丹嘅要求，向車路士就簡迪作出正式嘅收購，據聞轉會費將達到5000萬鎊，咁樣代表車路士單單利用一個球季就令簡迪升值左2000萬鎊，實在係非常誇張。皇馬對簡迪感興趣，最主要係因為睇中佢嘅防守能力，特別係今夏佢地嘅兩位中場占士洛迪古斯同伊斯高都有可能離隊他投，所以收購呢位法國中場對於皇馬黎講就相當重要啦。

雖然轉個手車路士就可以賺到2000萬鎊，但係領隊干地知道簡迪對於球隊黎講有幾重要，所以並無將佢出售嘅意思。預計為左抗衡皇馬嘅銀彈攻擊，車路士今夏都必定會為簡迪提供一份新合同，以確保留住這位中場核心。

可惜嘅係，掌管車路士買賣球員嘅並唔係領隊干地，而係球隊嘅體育總監，所以如果總監覺得適合，無論干地點反對都係無阻轉會嘅發生。所以，車路士下季嘅命運如何，將非常睇體育總監如何決定買賣球員了。