【時也命也】勇士橫掃馬刺，連續三年殺入NBA總決賽！

文：MenClub Mr.波特　　圖：互聯網
POSTED ON 23 May 2017


NBA西岸決賽黎到第四戰，手握絕對優勢3：0嘅勇士，繼績出戰主場嘅馬刺。而馬刺方面，核心Kawhi Leonard仍然因傷連績第三場缺陣，再加上上仗受傷嘅David Lee亦同樣無法上陣，因此馬刺今日嘅陣容完全可以用天殘地缺黎形容。

黎到今日呢場生死戰，馬刺主教練Gregg Popovich決定變陣，把老將Manu Ginobili放進正選陣容，排出一套小球陣容：Patty Mills、Danny Green、Mannu Ginobili、Jonathon Simmons及LaMarcus Aldridge，嘗試改變一下打法。

可惜嘅係，戰術嘅改變並唔可以減少雙方如今嘅實力差距，雖然「鬼切」已經無視年齡打出唔錯嘅表現，但係勇士憑住Stephen Curry同Kevin Durant兩位得分高手，好快就將領先優勢擴大至兩位數。

雖然馬刺並無輕易舉手投降，但每當馬刺收窄分差至接近5分之際，勇士又會頻頻得分，重新領先超過10分。

喺第3節，勇士進一步擴大比分至超過20分，而之後馬刺雖然咬緊牙關將分差重新減少至只有11分，但係勇士喺呢一節嘅最後1分鐘左右再次將領先優勢增加到20分，實在令馬刺毫無辦法。

最後一節，馬刺可以出嘅牌已經出晒，Popovich亦已經再無辦法進一步收窄比分，最終勇士一直領先超過10分下完成最後一節，結果勇士以129：115擊敗馬刺，以總局數4：0橫掃呢支西岸二哥成為西岸冠軍，並率先打入NBA總決賽，而今次亦係勇士連續第三年打進總決賽，喺西岸已經近乎無敵手啦。


其實勇士能夠喺西岸決賽咁輕鬆晉級，真係時也命也，因為另一邊廂嘅馬刺喺季後賽就飽受球員傷患困擾，好似核心Kawhi Leonard就喺第一戰因扭傷腳踝，導致之後3場比賽都無法上陣，令球隊攻防兩端嘅實力都大打折扣，特別係馬刺無人能夠好好咁限制KD，令佢可以輕鬆喺場上得分。

除左Leonard，馬刺喺更早之前已經有正選控衛Tony Parker受傷報銷，令馬刺失去今年季後賽表現最好嘅球員之一。而上仗，Lee嘅受傷亦令馬刺再失去一位可靠嘅後備。喺失去多位主力球員後，Popovich已經盡力用上陣容上可用嘅一切，而頂替嘅球員好似Simmons亦已經交出超過預期嘅表現，只可惜雙方實力差距實在太大，最終演變成單方面嘅大屠殺。

不過勇士亦都真係值得稱讚，特別係Curry同KD，呢兩位得分手今日都表現出色，其中Curry三分球13投5中，全場上陣33分鐘，取得36分6助攻5籃板；而KD就上陣37分鐘，13投10中，三分球4投2中，罰球7罰全中，高效取得29分12籃板4助攻1封阻。


擊敗馬刺後，勇士將會靜待東岸決賽嘅勝方，目前騎士以2：1領先塞爾特人，故預計勇士將最少有數天的休息時間。