【再見了！】一代傳奇落幕，羅馬王子托迪正式掛靴！

文：MenClub Mr.波特　　圖：互聯網
POSTED ON 29 May 2017


當你以為永遠唔會發生嘅事，最終都係有發生嘅一日。就好似NBA咁，當你以為鄧肯同高比呢啲球員唔會老嘅時候，佢地就喺舊年夏天一齊退役。而羅馬王子托迪，亦終於走到呢一日，尋晚意甲收咧日，亦都係托迪球員生涯嘅終點站。

現年40歲嘅托迪，一生為羅馬呢支首都球隊效力，1989年加入羅馬嘅青訓，轉眼至今已經效力呢支球隊28年，而為一線隊上陣亦達到25年，絕對係球隊歷史上最偉大嘅球員沒有之一。

尋晚羅馬收咧日嘅隊手係熱拿亞，托迪喺下半場54分鐘後備上陣，獲得全場球迷嘅大力歡呼，睇見呢一幕都真係令人毛管戙，因為呢一次上陣就係佢球員生涯嘅最後一次上陣啦，唔會再有下一次架啦。

最終，羅馬喺呢場比賽以3：2擊敗對手完美收爐，而托迪亦完成了他生涯最後一場比賽，賽後一眾職球員以至全場球迷都同托迪舉行告別慶祝派對，球員將佢拋向天，雖然佢嘅離開令人婉惜，但係睇見呢一幕又好為佢開心。

慶祝完畢，托迪亦正式迎來佢嘅告別典禮，主場球迷全場爆滿，托迪首先接過球隊送給他的10號球衣，其後慢慢繞場一周向球迷道謝，之後佢又拎起支咪向家人、球迷、球隊、曾經嘅隊友們逐一感謝，場面感人至極，多位現場球迷亦都大感不捨而落淚。


托迪被稱為羅馬王子唔係無原因的，佢一生對羅馬忠心耿耿，無論出面嘅世界點好，其他球隊為佢開咩價都好，佢都唔會有任何離心，對球隊可以共富貴亦都可以共患難。能夠代表羅馬嘅野，除左鬥獸場同教宗，我諗就係托迪啦。

喺羅馬25個球季，托迪一共為球隊上陣左786場攻入307球，並為球隊帶黎1次意甲冠軍、2次意大利杯冠軍以及1次意大利超級杯冠軍。