【續約?】「呂布」伊巴謙莫域將與曼聯續約？！

文：MenClub Mr.波特　　圖：互聯網
POSTED ON 31 May 2017


曼聯成功喺歐霸盃決賽上擊敗阿積士奪得冠軍，令佢地雖然喺聯賽只係排名第6位，但都獲得來季歐聯分組賽嘅資格。有左參戰歐聯嘅機會，預計曼聯今夏勢必會大手增兵以應付多條戰線。

而除了因要為收購球員苦惱外，領隊摩連奴仲要為今夏合約到期嘅球員處理是否續約嘅事宜，其中「瑞典神塔」伊巴謙莫域就係其中主要嘅一位，因為佢係今季曼聯入球最多嘅球員，佢嘅攻擊力絕對係宜家嘅曼聯最需要的。

對於曼聯黎講，雖然伊巴謙嘅能力係無容置疑，但係佢因為都已經35歲，再加上喺4月嘅時候不幸重傷提早收咧，所以令到佢今夏續約曼聯一事變得非常唔明朗。不過，伊巴謙已經完成左手術，而醫生喺手術期間發現呢位前鋒身體異於常人，膝部完全無任何多餘嘅傷患，只等受傷嘅十字韌帶復元就可以再上陣，目前預計佢將會喺今年冬天時間復出。

另外，喺受傷期間有傳伊巴謙可能轉戰美職聯，但喺呢位神鋒近日已經否認，佢對於離開主流聯賽並無興趣，並且認為自己可以繼績喺高組別聯賽踢多1-2年。所以，伊巴謙已經向曼聯提出續約要求，雙方將會進行談判，以領隊摩連奴同伊巴謙嘅交情，相信只要佢知道對方嘅受傷情況係點，同埋知道佢可以好快康復回歸球場嘅話，我諗同佢續約應該都唔成問題。

不過令人擔心嘅係，雖然伊巴謙身體異於常人，但係佢始終都就黎36歲，而呢個時候傷到十字韌帶都真係非常之唔理想，因為呢種傷唔係咁易康復，特別係呢個年齡嚴重程度都會加倍。究竟摩連奴會唔會繼續留用呢位愛徒呢? 而伊巴謙又可唔可以康復後繼績交出頂級嘅表現呢? 球迷們真係要拭目以待！