【車路士噩耗！】夏薩特在比利時國家隊集訓時重創骨折！

文：MenClub Mr.波特　　圖：互聯網
POSTED ON 05 Jun 2017


今年車路士喺英超成功奪得聯賽冠軍，球隊核心中前場夏薩特絕對係表現最好嘅球員之一，佢今季一共喺英超入左16球，係車路士繼前鋒迪亞高哥斯達後入球最多嘅球員。

而就喺2016-17賽季正式結束後，夏薩特進入比利時國家隊同一班同胞展開集訓，備戰2018年世界盃外圍賽，但係估唔到喺備戰岩岩開始唔係好耐嘅日子，夏薩特就傳黎一個巨大嘅壞消息。

目前比利時正在進行嘅備戰，係香港時間聽日凌晨將會同捷克嘅友誼賽，但就係岩岩嘅一次訓練課入面，夏薩特唔小心嚴重扭傷右腳腳踝，其後接受檢查後確診為骨折，將需要接受手術以便盡快康復。

暫時夏薩特仲未進行手術，但係預計今次佢可能需要至少2-3個月嘅時間先可以完全康復過黎，計一計佢可能會喺9月先可以復出，咁樣代表佢好大機會喺英超新球季缺陣開始嘅2-3場比賽。

對於衛冕冠軍車路士黎講，失去夏薩特將令球隊戰力大打折扣，咁樣可能會令球隊季初有失分嘅機會。要知道車路士上季能夠壓倒列強奪得英超冠軍，球員較少受傷係原因之一，而唔使分心打歐洲亦係另一個原因，如果夏薩特最終未能夠好似預期咁復出，相信車路士一定要諗定Plan B以確保唔好嚴重影響球隊戰力。

預計喺夏薩特缺陣期間，如果車路士無購入其他大牌中前場球員，咁西班牙翼鋒柏度將會取代呢位比利時核心成為球隊嘅正選球員。