【何去何從？】「呂布」伊巴謙莫域希望下一站係皇馬？

文：MenClub Mr.波特　　圖：互聯網
POSTED ON 27 Jun 2017


曼聯前鋒「呂布」伊巴謙莫域喺今年4月不幸受傷後，提前賽季完結嘅佢已經進行左手術，目前正值休養期間。不過，由於手術後預計伊巴將需要至2018年先可以復出，所以曼聯方面已經表態唔會同呢位神鋒續約。咁究竟佢嘅下一站係邊呢。

伊巴上季一共為曼聯攻入左28球，係隊內嘅首席射手，所以就算佢已經35歲，但係佢明顯仍然足夠強大，絕對係球壇內最強嘅前鋒之一。對於曼聯唔同自己續約，其實伊巴都不愁無下家嘅，因為唔少球隊已經相繼聯絡伊巴嘅經理人拉奧拿，表達了對伊巴嘅興趣，但係呢啲球隊就主要係美國大聯盟嘅球隊居多。

對於加盟美職聯，目前嘅伊巴並無好大嘅興趣，佢更加想繼績留喺主流歐洲聯賽繼績征戰，其中更有消息指伊巴希望佢嘅經理人可以助佢加盟西甲班霸皇馬，但係皇馬方面拒絕討論，所以暫時黎講呢位「瑞典神塔」要加盟皇馬應該無咩機會。不過，如果皇馬後備射手莫拉達真係離隊他投，咁樣伊巴都不失為取代莫拉達位置嘅絕佳人選。

當然，伊巴其實係仲有機會重返曼聯嘅，不過就要睇佢嘅康復進度，同埋究竟曼聯今夏可以搵到啲咩球員番黎啦。另外，伊巴嘅人工亦都係佢留隊或其他球隊簽佢嘅一大阻礙，因為佢宜家喺曼聯嘅實際週薪超過36萬鎊，呢個價錢對於35歲嘅球員黎講絕對高得驚人，所以除非伊巴願意大幅減薪，否則佢將會無太多合適嘅選擇。

雖然宜家睇就好似無咩選擇比伊巴揀，但係預計到佢2018年復出嘅時候，有唔少球隊都會想喺冬季轉會窗增兵，屆時如果伊巴無合約在身，以佢嘅能力，佢絕對係一眾球隊增兵嘅優先選擇呢！