【逆天】公鹿獲兩獎，「字母哥」竟比最佳新秀更年輕？！

文：MenClub Mr.波特　　圖：互聯網
POSTED ON 28 Jun 2017


尋日，NBA舉行首屆年度頒獎典禮，一口氣頒發所有年度大獎，其中最受人關注嘅獎項 - 年度最佳球員MVP，得主為雷霆嘅Russell Westbrook。除此之外，公鹿今年亦收獲豐富，因為佢地有兩位球員成功獲獎，其中「字母哥」Giannis Antetokounmpo獲得最佳進步獎，而Malcolm Brogdon則有啲爆冷咁擊敗76人兩大將Joel Embiid及Dario Saric獲得最佳新秀獎。

對於公鹿球迷黎講，能夠有兩位球員獎獲得年度大獎，絕對值得高興。而當你發現多一個事實時，你可能會更加驚喜。

「字母哥」進入NBA後，已經喺公鹿完成左4年合同，如今已經成為一名全明星級別球員，係公鹿嘅絕對核心，甚至有唔少人亦認為，呢位黎自希臘嘅怪物將會係未來MVP嘅熱門人選。而獲得最佳新秀嘅Brogdon，今季場均拎到10.2分4.2助攻2.8籃板1.1抄截，雖然數據唔算好驚豔，但係佢就曾經喺今季拎過大三元，所以可以睇得出佢嘅全能性。

照常理，「字母哥」已經成為NBA嘅巨星，佢理應比新秀年紀更大吧！不過事實往往就係相反，今年「字母哥」其實就只係22歲，但係奪得最佳新秀嘅Brogdon其實已經24歲，所以「字母哥」係足足細過Brogdon兩歲架！係咪估佢唔到呢？

2013年參加NBA選秀大會嘅「字母哥」，其實喺2012-13球季曾喺希臘聯賽征戰，當時嘅佢就只有17歲，但係佢嘅天賦已經展現出黎，所以最終以首輪第13順位進入公鹿隊，而當時佢就只係18歲。

而Brogdon則係大學足足逗留左5年(期間曾因腿部嚴重受傷而沒有參加NCAA一年)，所以佢喺去年參加選秀大會時已經23歲。不過正因為咁，呢位新秀先多左一份成熟感，特別係宜家公鹿嘅陣容真係非常年輕，所以球員成熟將對球隊有好嘅影響。

講真喺NBA年齡真係唔係最重要，就好似當年40歲嘅Tim Duncan仍然係NBA防守最出色嘅球員，而Derrick Rose亦以23歲之齡勇奪NBA歷史最年嘅MVP，所以就算核心比新秀更年輕亦唔算得上係咩問題，甚至令公鹿球迷更期望究竟呢兩位球員可以將球隊帶到咩高度！