【重磅交易】火箭7人+首輪簽換船長Chris Paul！

文：MenClub Mr.波特　　圖：互聯網
POSTED ON 29 Jun 2017


目前NBA雖然處於休賽期，但係各支球隊都正為來季嘅陣容提升而努力，部份球隊亦己經有動作，好似木狼成功獲得Jimmy Butler，而湖人又同籃網進行左交易。不過講到震撼，今日呢宗可能係今年夏天最大嘅一宗交易，因為當中牽涉嘅多達8人，而主角更加係本來今夏最大牌嘅自由球員「船長」Chris Paul。

Chris Paul喺較早前其實已經明確表示自己將會跳出合同，並成為一名自由球員，同唔同嘅球隊接觸，希望可以睇下有咩新機會，特別係挑戰總冠軍嘅機會。其中本來傳得最火熱，話CP3最有機會加盟嘅球隊係馬刺，正當所有馬刺球迷正掙札為了簽入CP3而打破球隊陣容平衡嘅時候，火箭卻突然殺出黎做左程咬金，搶走左呢位超級控衛。

今次火箭同快艇進行嘅交易絕對係唔講少，因為當中一共牽涉左8名球員以及一個未來首輪簽，以下為本次交易嘅情況：

火箭送出： Patrick Beverley Lou Williams Sam Dekker Montrezl Harrell Darrun Hilliard DeAndre Liggins Kyle Wiltjer 2018年首輪選秀權部份現金

快艇送出： Chris Paul

今次火箭可算得上係傾盤而出，拎左半隊波出黎同快艇交易CP3，當中最具價值嘅絕對係Beverley同Williams，其中Beverley預計將到快艇取代CP3嘅位置，當然佢嘅組織力無可能同CP3相提並論，但係佢對比賽嘅投入程度同埋拼搏，將會係快艇所喜歡嘅野。而由於快艇另一主力J.J. Redick預計將會離隊，所以Williams應該會係填補佢位置嘅絕佳人選，雖然Williams平時只係充當第六人角色，但係加盟快艇後佢應該會成為球隊主力正選，甚至係進攻方面嘅一大殺器。

火箭方面，在得到Chris Paul後，佢地來季嘅正選陣容暫時將會係咁： PG: Chris Paul SG: James Harden SF: Trevor Ariza PF: Ryan Anderson C: Clint Capela

CP3加上Harden後，佢地將可以成為聯盟最強嘅後衛組合，直逼勇士嘅「浪花兄弟」。不過其實我Mr.波特有點擔心，就係上季轉型為控衛嘅Harden需要大量球權，而CP3亦都一樣，咁樣究竟進攻時應該將個波比邊個呢？如果交比CP3，Harden上季發掘出黎嘅助攻能力會唔會浪費左呢？咁如果比個波Harden做，咁CP3又無用武之地，呢個問題真係好值得火箭去思考。

不過亦都可以咁講，控球交番比CP3，Harden專心進攻，佢將可以加入更多無球跑動，繼而減低佢嘅失誤次數，要知道上季轉型控衛後，Harden場均出現5.7次失誤，係聯盟之冠。相反，CP3上季場均失誤只有2.4次，呢個將可以大大改善火箭嘅失誤問題。

雖然火箭目前正選嘅牌面已經相當唔錯，但係有指佢地仲想簽埋Paul George番黎，組成超級三巨頭，如果真係咁火箭嘅陣容將絕對有力挑戰勇士。不過，火箭咁樣組軍亦都係存在一啲隱憂，就係佢地嘅後備陣容可能會有啲受損，再加上岩岩奪得年度最佳教練嘅Mike D'Antoni從來正選加上後備只會用上7-8人黎輪換，咁樣佢地究竟會唔會好似岩岩一季咁，去到季後賽耗盡體力，最終無法挑戰總冠軍呢？定係真係靠呢套陣容可以衝擊總冠軍呢？大家一定要留意新球季嘅NBA啦！