【傳奇待遇？】不只退役號碼，湖人球迷要求退役「Bryant」

文：MenClub Mr.波特　　圖：互聯網
POSTED ON 30 Jun 2017


湖人傳奇球員Kobe Bryant喺去年4月已經退役，而佢雖然離開左NBA比賽賽場，但係佢都仲係不時會出現喺球迷嘅視線入面，好似較早前佢就接受左湖人顧問Magic Johnson嘅邀請，重返湖人為球隊評估一眾球員。

作為湖人球迷，Kobe可以話係佢地心目中好似「籃球之神」Michael Jordan一樣嘅存在，佢喺湖人嘅歷史地位，相信現時黎講真係無人能及，就算「天勾」同Magic兩位傳奇都應該比唔上呢位「小飛俠」。另外，Kobe喺世界各地擁有大量球迷，唔計Jordan嘅話，相信Kobe絕對係目前呢個地球入面最多粉絲嘅籃球員。

Kobe球員生涯一共效力左湖人20個球季，為「紫金軍團」帶黎5次NBA總冠軍，其中包括一次三連冠以及一次二連冠，成就絕對輝煌。預計未來湖人必定會為呢位球隊傳奇舉行球衣退役儀式，而正當唔少人討論究竟湖人應該為Kobe退役其曾經穿過嘅8號球衣定係24號球衣，又或同時退役呢兩個號碼嘅時候，近日就有人提出應該為Kobe再退役另一樣野，講緊嘅就係佢個名「Bryant」啦。

NBA喺上個星期舉行左一年一度嘅選秀大會，其中湖人除左以榜眼簽成功得到Lonzo Ball外，仲成功以27號、30號同42號簽，成功簽入Kyle Kuzma、Josh Hart同Thomas Bryant，合共4位新秀。而黎到今日，湖人就正式為後面三位新秀舉行新聞發佈會，向媒體逐一介紹佢地。

而眼利嘅球迷就見到，拎住31號球衣嘅Thomas Bryant，佢嘅球衣名字就係寫住「Bryant」，對於呢個情況，球迷都覺得非常唔習憤，因為佢地一向都睇開湖人寫住Bryant嘅球衣係8號或者24號，但係宜家竟然係31號？所以佢地就向湖人提出一個建議，就係將「Bryant」呢個名字退役，就係以後湖人其他球員嘅球衣都唔可以再用Bryant呢個名。

有球迷就建議呢位叫Bryant的新秀可以嘗試更換一下姓氏，不過呢個又好似有啲強人所難。大家又有無咩提議可以比湖人，又或者比呢位叫Bryant嘅新秀呢？

其實喺NBA咁多年歷史入面，基本上就只會退役球員嘅球衣號碼，從來未試過會退役球員個名，就算係Jordan都無咁嘅待遇。不過有時候歷史係創造番黎嘅，湖人都不妨考慮下呢個建議，但係以後叫Bryant嘅年輕球員，如果有機會加入湖人時就真係要諗清楚啦。