- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| |
如果你係一個較為資歷淺嘅曼聯球迷，可能你會認為最能夠代表「紅魔鬼」嘅球員會係碧咸又或C朗拿度。不過，如果你已經作為一名曼聯球迷多年，我諗喺你心目中最能夠代表呢支豪門嘅球員應該就係人稱「奧脫福大帝」又或「簡大帝」嘅傳奇級前鋒簡東拿。一講起佢，大家係咪即刻好想著番件企領衫先！ | |
| 其實我Mr.波特認為，只要你係球迷就算無睇過簡東拿踢波，都一定聽過佢個名，特別係佢除左係曼聯經典前鋒之外，佢退役後亦經常拍攝唔同嘅足球廣告，我諗你一睇番一定咩記憶都番晒黎。好！一齊黎重溫下簡大帝嘅演出先。 | |
| 睇完簡大帝幕前演出之後，當然係睇番呢位前鋒嘅球員生涯。現年51歲嘅簡東拿依然心繫足球，但係除左足球，佢亦致力推廣沙灘足球，並且成為美職聯球隊的足球總監。另外，除左足球佢亦都曾經成為一名舞台劇演員同電影演員，其中有一次佢係為左幫佢嘅老婆而踏台板的。 | |
| 1966年喺法國馬賽出世嘅簡東拿，14歲就加入當地球隊SO Caillolais進行青訓。而年輕嘅簡東拿同佢爸爸一樣係踢門將位置的，但係其後因為佢出色嘅創造力，所以球隊就將佢改造成一名鋒線球員。簡東拿一共喺SO Caillolais呢支球隊入面訓練左1年，但就一共參加左超過200場比賽。 | |
| |
| 1981年，簡東拿離開SO Caillolais轉投更為人熟悉嘅法國球隊歐塞爾。不過當時嘅佢仲係未夠資格進入一隊，所以又喺青年隊入面訓練左2年，直至1983年11月佢先有機會正式為一隊上陣比賽。17歲就成功為歐塞爾一隊上陣嘅簡東拿，並無好穩定嘅上陣機會，所以佢喺1985-86球季被外借出去法乙球隊吸收經驗，最終佢喺上陣15場比賽下攻入4球，下一季歐塞爾就將佢回收番黎用。 | |
| 1986-87重返歐塞爾後，簡東拿終於獲得穩定嘅上陣機會，呢一季佢一共上陣左40場比賽攻入17球，出色嘅入球能力開始令人認識呢位年輕射手。正當所有人都對呢位射手抱有期望之際，佢嘅個人衝動問題亦開始暴露出黎，首先佢喺法國隊入面打佢隊友嘅臉部，之後佢又喺比賽入面以功夫腳踢到對方球員，最終被重罰停賽三個月，之後獲減刑只需停賽兩個月。 | |
| 1988年夏天，簡東拿以破法國國內轉會費轉會加盟馬賽，而呢個亦都係簡東拿兒時夢想，因為佢由細到大都係馬賽嘅粉絲。可惜嘅係，年少氣盛嘅簡東拿完全無辦法控制自己嘅情緒，佢喺一場比賽入面用波射向觀眾席，其後又因被入替而將波衫掉走，最終球隊將佢停賽一個月。值得一提嘅係。當時被球隊停賽前數個月，簡東拿因侮辱國家隊領隊，最終被國家隊停賽一年。 | |
| |
| 加盟馬賽後明顯未能夠適應下，簡東拿被球隊外借至另一法國球隊波爾多效力6個月。接下來一季，簡東拿再次被外借，今次佢加盟嘅係蒙彼利埃。同之前一樣，簡東拿再次涉及一次隊內打鬥，最終被球隊停賽10天。雖然係咁，球隊並無雪藏佢，相反喺佢嘅幫助下成功拎到法國盃冠軍。 | |
| 之後一季馬賽回收簡東拿回來，可惜嘅係球隊並無重用佢，佢呢一季只係上陣18場攻入8球，但係球隊就成功拎到法甲聯賽冠軍。縱然係球隊奪冠嘅球員之一，但係簡東拿都係被球隊清洗，並轉投法甲球隊尼姆。而劇情並無咩大變化，簡東拿再次因動為不當被罰停賽，今次佢竟然係用個波掉去球證面部以示不滿其判決。 | |
| 因為行為問題多次被停賽，簡東拿喺1991年12月16日宣佈退役，當時嘅佢就只有25歲。幸好嘅係，當時法國國家隊教練柏天尼非常喜歡簡東拿，並有意將他帶回球壇，最終佢成功勸服呢位狂人，並以英格蘭聯賽黎作為佢重返球壇嘅新地點。 |
| 不過簡東拿要加入英足壇亦一啲都唔順利，佢首先被利物浦拒絕，之後錫菲聯亦因無能力所以拒絕左佢嘅加盟。最終佢喺冬季轉會窗關閉前，以90萬鎊轉投列斯聯，其後雖然佢只係為球隊上陣左15場聯賽攻入3球，但列斯聯成功奪得英超轉名前嘅最後一個甲組聯賽冠軍。 | |
| |
| 1992年11月，簡東拿離開效力短短1年嘅列斯聯，並轉投為人所熟悉嘅「紅魔鬼」曼聯，轉會費為120萬鎊。由於簡東拿喺係賽季開始左2個多月後先中途轉入曼聯，所以佢對球隊嘅影響力仲未好大，不過由於曼聯實力強大，最終雖然簡東拿喺聯賽只係攻入9球，但係曼聯都係成功奪得首屆英超冠軍。 | |
| 黎到加盟曼聯嘅第二季，簡東拿表現出色，全季為球隊攻入25球，其中包括聯賽嘅18球，曼終曼聯呢一季除左成功衛冕聯賽冠軍，更加拎埋足總盃冠軍，成為本土雙料冠軍。明顯簡東拿喺費Sir嘅執教下收左唔少火，就係咁佢先可以認真發揮自己嘅真正實力。可惜好景不常，1995年1月簡東拿再次爆發，佢喺面對水晶宮嘅一場比賽入面，因紅牌被驅逐離場時被場邊對方球迷出言挑釁，所以呢位火爆大師立即衝去該名球迷，使出震驚球壇嘅「功夫腳」，一腳踢落該名球迷身上。最終簡東拿被足總重罰停賽9個月，並且需要繳交罰款。另外，由於事件嚴重，簡東拿亦被法院判坐監兩個星期，呢件事絕對係震驚整個足球壇。 | |
 | |
| 雖然犯下嚴重錯誤，又長時間停賽，但係費Sir並無放棄簡東拿，喺佢停賽結束後費Sir再次比簡東拿上陣比賽，而佢亦都無令費Sir失望，復出後兩季分別攻入19球及15球，最終曼聯呢兩季亦成功連奪聯賽冠軍。 | |
| 1996年12月，簡東拿喺面對新特蘭嘅比賽入面攻入左兩球，其中喺78分鐘嘅入球絕對係佢嘅代表作。當時佢喺半場附近位置控球，接住成功擺脫兩名對方球員然後加速殺向禁區，期間佢同隊友做左一次撞牆配合，而隊友將個波傳番比佢之後，由於眼見門將企出左黎，所以佢喺觸球個一下就選擇以笠射攻門，最終攻入左一記足以名番青史嘅美妙入球。 | |
| 1997年喺球隊再次奪得聯賽冠軍後，簡東拿決定退役，要知道個陣佢只有31歲，亦處於當打之年，所以唔少人都無法理解。失去簡東拿嘅曼聯就好似失去重心一樣，接落黎嘅一季曼聯立即四大皆空，可見簡大帝有幾咁重要。 | |
| 退役後，簡大帝繼績喺足球界入面舉重輕重，佢推廣足球運動亦都不遺餘力。除左足球，佢亦都拍左唔少法國電影，宜家絕對可以被稱為老戲骨啦。
| |
| 簡東拿喺曼聯其實只係效力左短短嘅5年，但係佢就以夢幻般嘅表現征服左奧脫福嘅球迷，成為呢個球場嘅「大帝」。人生無人會完美，雖然簡東拿性格暴燥充滿缺憾，但係單以足球表現黎睇，佢都真係一位不可多得嘅天才呢！
| |