【海嘯啦！】「單打王」投勇士，組最強射手團！

文：MenClub Mr.波特　　圖：互聯網
POSTED ON 07 Jul 2017


勇士岩岩成功奪得2017年NBA總冠軍，佢地嘅四巨頭陣容：Stephen Curry、Kevin Durant、Draymond Green及Klay Thompson，被認為喺現今NBA最強嘅組合，根本無邊支球隊可以喺季後賽一個系列賽入面可以贏到佢地4場，再加上佢地非常年輕，所以預計佢地將可以有一段時間統治NBA。不過，呢支總冠軍並無原地踏步，佢地今夏繼績對陣容進行調整，最近就成功簽入人稱「單打王」嘅射手Nick Young。

去年夏天Kevin Durant加入勇士係令宜家呢支球隊變得更強嘅主因，不過勇士原先最強嘅地方就係「浪花兄弟」Curry同Thompson，佢地兩個嘅三分球喺NBA之冠，喺大量嘅三分出手下命中率亦保持得極高，令NBA掀起一股三分熱潮。

上季，Curry三分球一共出手789次，命中324球，命中率達到41.1%，而Thompson三分球就出手左647次，命中268球，命中率為41.4%。當然，佢地兩個嘅三分命中率並唔係聯盟最高，但係出手次數同命中球數就分別排名第一同第二，可以見到佢地嘅三分球有幾咁恐佈。

而今次加入Young後，勇士嘅三分球情況將可能變得更加恐佈，因為Young嘅三分球亦都係命列聯盟前十的。上季效力湖人嘅Young，三分球一共出手421次，命中170球，命中率為40.4%，雖然唔可以同Curry或Thompson相比，但係其實已經相當出色架啦。

要知道喺上季黎講，能夠三分球出手400次，而命中率達到40％或以上嘅球員只有11個，而來季勇士將集齊當中嘅3位，可以預想佢地將會喺比賽入面不斷以三分球攻擊籃框，真係唔單止用浪花黎形容，而真係要改口叫佢地「海嘯兄弟」啦。

唔單止係咁，仲有一項數據證閒勇士係一支超級投射球隊，個數據就係Catch and Shoot嘅有效命中率啦。睇下下面張圖，上季排名聯盟第一嘅就係Curry，命中率達到67.4％。而第二呢？竟然就係加入勇士嘅Young，佢嘅命中率達到65.4%，然後KD同Thompson就分別排名第6同第9位。

睇見勇士可能又搵到一位將有機會發揮佢全部實力嘅球員，真係可以話佢地已經再一次預訂左明年嘅總決賽門票啦.....其他球隊究竟有無方法擊倒勇士呢？