【無鋒陣？】車路士新球季可能無前鋒用，干地點算？

文：MenClub Mr.波特　　圖：互聯網
POSTED ON 13 Jul 2017


作為英超衛冕冠軍嘅車路士，喺新球季開始前已經面臨危機，因為來季佢地隨時陷入無前鋒用嘅境地。首先，領隊干地與迪亞高哥斯達關係破裂，然後以為手到拿來嘅盧卡古又突然轉投曼聯，係咁嘅情況下車路士陣中可以用嘅正前鋒就只係得番23歲嘅巴舒亞伊一人，但係好明顯佢宜家都係難當大任。咁究竟車路士條前鋒線點搞呢？

失去左盧卡古，車路士其實都仲可以喺轉會市場買其他前鋒，當中以皇馬後備殺手莫拉達特別得領隊干地鍾意，所以呢支英超衛冕冠軍絕對可以向其出手。不過，就係轉會市場無乜大牌前鋒可供選擇下，皇馬就真係唔愁無人出價莫拉達，所以佢地就可以慢慢咁同車路士談判，甚至吊高黎賣。預計如果車路士真係要收購莫拉達，可能需要動用7000-8000萬歐元。雖然價錢好高，但係干地已經無咩無太多選擇，佢亦只可以盡量求皇馬賣平少少咁多。

收購莫拉達可以話係干地目前最好嘅選擇，因為可以用錢解決嘅問題就唔係問題，之不過老闆艾巴莫域治個心可能就唔係咁舒服囉，因為球隊宜家擺明係將會比人斬到一頸血。咁除左收購莫拉達，車路士仲有無其他選擇呢？

其實除左莫拉達，轉會市場入面都仲有其他前鋒可供干地選購嘅，不過佢地嘅質素當然無盧卡古同莫拉達咁高啦。而要數當中最高質而又有機會簽到嘅前鋒，可能就要數到意甲拖連奴前鋒比洛迪，呢位意大利前鋒目前只有23歲，上季為球隊上陣38場下攻入28球，其中喺聯賽就攻入26球，排名聯賽神射手榜第3位。

另外，如果車路士想揀較抵玩嘅就可以試下前利物浦前鋒巴洛迪利，呢位意大利前鋒將可以免費轉會，而佢岩岩一季喺法甲嘅表現都算唔錯，只係狀態有啲唔穩定。另外，PSV燕豪芬前鋒盧克迪莊亦都係一個唔錯嘅選擇，呢位26歲荷蘭前鋒喺2014-16兩個球季入面一共為球隊上陣左88場比賽攻入58球，效率相當之高。可惜嘅係，岩岩一季迪莊狀態大幅下滑，喺37場比賽入面只係攻入9球，呢個亦都係干地需要考慮嘅地方。

如果真係連以上嘅前鋒都無辦法得到嘅話，咁干地仲有一個辦法嘅，就係同迪亞高哥斯達和解勸佢留隊，但係呢個可能性絕對係微乎其微，因為目前已經有唔少傳聞指哥斯達將會先外借出去其他球隊，然後喺明年1月份重返馬體會。另外以干地強硬嘅性格，佢當然唔想屈服同哥斯達和解，不過如果今夏球隊真係無辦法收購任何前鋒，咁干地可能真係得番呢條路行。

作為英超嘅衛冕冠軍，車路士黎緊一季需要多線作賽，英超、歐聯、足總盃、聯賽盃，以佢地宜家前鋒線嘅陣容，佢地可能連聯賽都無辦法應付，唔好講仲要參加對手實力有機會更強嘅歐聯。睇黎如果車路士想保持好成績嘅話，老闆艾巴今夏都真係要燒下錢架啦，如果唔係4條戰線好大機會只落得兩頭唔到岸嘅地步。