【世界波！】「良月月巴」回歸愛華頓即變回朗尼？！

文：MenClub Mr.波特　　圖：互聯網
POSTED ON 14 Jul 2017


較早前，曼聯隊長31歲嘅朗尼正式結束自己喺紅魔鬼嘅13年生涯，重返母會愛華頓。唔少人都認為，近兩年朗尼嘅狀態已經大幅下滑，基本上已經唔算係一位一線球員，甚至有球迷笑佢身型走樣，應該叫做「良月月巴」，能夠重返愛華頓都只係只為球隊念舊，感覺似番去養老咁。不過，事實又係唔係真係咁呢？

今日，愛華頓就去到肯尼亞進行一場友誼賽，其中首次回歸嘅朗尼正選上陣，深得當地球迷歡迎，比賽期間更有球迷著住曼聯波衫衝入球場攬住朗尼，但係朗尼非常冷靜，該名進入球場嘅球迷亦由現場保安將帶走。

隨後，朗尼喺上半場大慨20幾30碼外接應隊友傳送後轉身，喺推前一步後大腳勁射，個波直飛向龍門，並喺對方門將手上越過，並且順利破網得分。朗尼呢個入球絕對係一記世界波，如果球迷記得嘅話，係咪好似當年(2002年)仲未轉投曼聯前嘅朗尼射破阿仙奴嘅個球世界波先？

2002年愛華頓vs阿仙奴：朗尼世界波收死施文！

一番到黎愛華頓，朗尼成個人好似生猛番晒，唔通真係好似朗尼咁講，佢需要更多嘅比賽機會，只要有比賽機會佢就可以重新調節自己至最佳狀態。如果真係咁，咁愛華頓宜家熱身賽真係要比多啲機會佢啦，咁樣隨時喺英超開鑼嘅時候，我地可以見番一個真正嘅朗尼，而唔係「良月月巴」啦！