Mayweather vs McGregor「世紀之戰」價值將超越NFL超級盃！

文：MenClub Mr.波特　　圖：互聯網
POSTED ON 20 Jul 2017


喺今年暑假，香港嘅體育盛事可謂一浪接一浪，其中就有英超亞洲盃、世界女排大獎賽、香港世界桌球大師賽2017等等。不過，如果講到世界性嘅盛事，近期就將會發生一場價值可能達到5億美元嘅賽事，講緊嘅就係拳擊界嘅「世紀之戰」Mayweather vs McGregor啦！

較早前，呢場「世紀之戰」已經進行左官方嘅發佈會，兩位參賽者Mayweather同McGregor亦到已經到台見面，雙方喺台上你一句我一句互噴垃圾話，又互相用唔同嘅方法黎進行挑釁，令觀眾對比賽嘅期待程度直線上升，預計賽事將會受到全球關注，屆時觀看人數隨時以千萬，甚至億計。

世紀之戰目前已約戰喺美國拉斯維加斯進行，而過往要數美國最受關注嘅體育比賽，必定要數美式足球NFL嘅超級盃(Super Bowl)。超級盃多年黎都係全美收視率最高嘅電視節目，甚至已經漸漸成為左一個非官方嘅全國性節日，所有人都會盡量抽時間去睇呢場比賽，並且多間公司都會爭取喺呢場比賽中間播放廣告，所以你可以預想呢場比賽嘅價值究竟有幾高。

雖然能夠媲美超級盃嘅賽事係非常罕有的，但係今次「世紀之戰」就有可能達至超級盃一樣嘅價值。據相關人士相信，今次「不敗拳王」Mayweather vs 「終極格鬥王者」McGregor嘅拳賽價值幾乎可以肯定超越超級盃，雖然宜家仲未可以100％肯定，但係預計應該唔會差太遠。

呢場賽事亦接受左大量賭注，而目前較年輕嘅McGregor則得到更多人落注，認為佢可以擊敗Mayweather，如果最終結果真係咁，真係隨時打爆個莊。咁當然莊家唔會坐以待斃，佢地已經增加其他賭盤，例如McGregor會否發癲，又或係McGregor會否在比賽期間突然出腳踢對方。

目前McGregor被更多人支持可以擊敗Mayweather，但係其實賽制對佢完全係一啲利都無，因為賽事係以佢唔熟悉嘅拳擊黎進行，咁樣即係代表佢全程只可以出拳，對一向打開UFC嘅佢黎講，最強嘅踢擊同鎖技將完全被封印，咁樣相對黎講單以拳頭佢可能無法擊倒Mayweather。知道賽制對自己不利下，McGregor全力投入喺出拳嘅訓練上，務求盡力追上單以拳頭進行嘅比賽。

你可能會覺得呢場比賽只係炒作，似做show多啲，但係事實上真係有好多人都好期待，而佢地喺台上又真係確實會打到爆晒缸，咁樣就算係做show都真係黎得有血有肉架！