【殺殺殺！】世界女排大獎賽一連三日決戰紅館！

文：MenClub Mr.波特　　圖：MenClub
POSTED ON 22 Jul 2017

近日香港進入暑假時間，香港有唔少活動相繼進行，其中包括屬於香港大型體育活動之一嘅世界女排大獎賽亦都喺尋日一連三日正式喺紅館展開，相信本地唔少排球迷都為之瘋狂。今次黎到香港參賽嘅四支球隊包括中國、日本、俄羅斯同埋塞爾維亞，每一支都絕對係世界勁旅，所以比賽起上黎精彩程度一定唔會令球迷失望。

其實喺尋日嘅比賽前，四支球隊都已經提前黎到香港，並喺香港唔同嘅場館進行訓練，唔知你地又有無撞到呢班高人一等嘅靚女排球員呢？

黎到賽事嘅首個比賽日，現場大批觀眾陸續湧入紅館，首場比賽由塞爾維亞大戰俄羅斯，兩支歐洲勁旅率先對上，令現場氣氛升溫。

比賽第一局兩支球隊都係先摸索對方嘅打法，所以分數都係你來我往，無話邊一方絕對佔優，最終俄羅斯首先取得決勝分，但係塞爾維亞成功抵住壓力，除左成功扳平令比賽進入Deuce，之後佢地再連取兩分，以26：24反勝俄羅斯，先取第一局。

第二局塞爾維亞明顯已經入晒局，表現非常出色，特別係佢地嘅網前攔截驚人，俄羅斯根本無法跨越呢堵高牆，所以比分慢慢被塞爾維亞拉開至超過10分，最終塞爾維亞呢一局輕鬆以25：14獲勝，總局數領先至2：0。

第三局，塞爾維亞仍然掌控住主導權，但係俄羅斯慢慢上力，佢地嘅攔網威力提升，成功連搶幾分從後趕上。不過好快塞爾維亞又成功調整重新擴大領先優勢，最終以一記超強發球成功破壞俄羅斯嘅一傳，以一記網前壓球成功取得決勝分，最終以25：19拎埋第三局，結果塞爾維亞以總局數3：0輕鬆贏左第一戰。

第二場比賽由目前世界第一嘅中國vs日本，呢場「中日大戰」中國隊當然受盡現場香港球迷支持，就好似主場一樣。呢支年輕嘅中國隊由22歲嘅隊長朱婷帶領下率先現身進行熱身，令現場氣氛升至極點。

雖然中國隊擁有身高優勢，但係日本隊開波一啲都唔弱，頻頻網前扣殺得分。不過中國隊有主攻手朱婷真係差好遠，佢喺網前嘅扣殺真係唔係人咁品，面對住佢日本隊根本攔唔到網。再加上中國仲有身高超2米嘅新星1號嘅袁心玥，令網前嘅攻擊力變得更加恐佈。不過日本並無被輕易拉開，憑住連環扣殺成功收窄落後嘅比分。不過始終中國隊實力更強，最終憑一次精彩嘅攔網，成功以25：19先取第一局。

第二局中國隊越戰越勇，朱婷多次嘅扣殺令日本隊無法招架，而中國隊嘅領先優勢亦因此不斷擴大。除左大力扣殺之外，中國隊亦多次展現用腦去得分嘅方法，絕對係相當精彩。最終中國以25：20再取一局，總局數2：0領先。

第三局日本隊先發制人，三局以黎第一次領先住中國黎打。雖然落後，但係中國隊仍然有精彩嘅攻擊，包括朱婷一記超級扣殺，勁到直接殺中日本隊球員面上，睇見都覺得痛呀。其後現場球迷大力支持中國隊下，呢支世界冠軍從後趕上，憑住朱婷嘅連環扣殺，最終成功追至19平手。不過日本隊再次連取3分，迫到中國需要叫暫停。暫停過後，中國隊成功連追3分下，今次到日本隊需要叫暫停啦。不過中國隊並未受到暫停影響，成功拎到賽點，但係日本死咬唔放下追成24平手Deuce。


戰至Deuce，雙方一人一分現場氣氛升至頂點，雙方竟然再打多差唔多20分，最終日本隊以35：33擊敗中國，成功追番一局至1：2。現場球迷對於能夠再至少睇多一局，就梗係開心啦！

第四局，兩支球隊都完全進入狀態，好似頭先個局Deuce入面咁一人拎一分。但去到比賽中段，中國隊開始憑住攻擊再次取得領先優勢，而日本隊係接球方面亦有失誤，所以中國一口氣領先左幾分。雖然一直落後，但係日本隊亦都無放棄，死咬住唔放。不過始終中國隊嘅攻擊力都係好強勁，所以日本隊都係無法阻止中國大錘朱婷嘅攻擊。但估唔到去到比賽收尾階段，中國隊竟然連番失誤，比日本隊成功收窄比分。但係結果中國隊始終都係技高一籌，最終中國以25：21獲得勝利，最終以總局數3：1勝利。

雖然只係第一個比賽日，但係呢場中日大戰都真係扣人心弦，總之一個字，精彩！