【注意】做運動嘅你，記住保護好你嘅膝頭哥呀！

文：MenClub 波特先生　　圖：互聯網
POSTED ON 29 Aug 2017


對於唔少運動員黎講，膝頭哥絕對係身體最重要嘅部份之一，呢個部位無論係足球、籃球、乒乓波、羽毛球、游水等等，都需要大量使用到，所以如果膝頭哥有咩損傷嘅話，你嘅運動員生涯，甚至連基本嘅跑步可能都會一併結束。

如果講到膝頭哥最易受傷嘅運動，籃球絕對係其中之一，因為呢項運動講求變向，又要衝刺急停，所以對膝頭做成好大嘅壓力，而喺NBA就曾經有唔少球星喺比賽入面膝頭受傷，最終較為好彩嘅仍然可以繼續打波，只係表現下跌，但唔好彩嘅可能就無辦法繼續比賽，令人婉惜。

講下較為好彩嘅，好似岩岩加入騎士嘅Derrick Rose，佢就曾經兩次出現膝頭嘅嚴重受傷，其中包括左膝前十字韌帶嚴重撕裂同埋右膝半月板受傷，呢兩次嚴重受傷主因都係佢喺比賽入面不斷快速變向，令其膝頭不斷被施加壓力，最終負荷唔到下受傷。呢兩次受傷令本來係NBA歷史最年輕嘅MVP變成如今水平只係一名唔算得上明星級別嘅正選控衛，真係令唔少球迷感到相當婉惜。

而Rose嘅情況已經算係好彩，NBA近年亦有兩位因為膝頭問題被迫提早結束球員生涯嘅球員，佢地就係Brandon Roy同埋Greg Oden。呢兩位球員都曾經展現自己無與倫比嘅籃球天賦，但無奈膝頭嘅傷患斷去左佢地嘅球員生命，最終早早離開NBA，甚至需要提早退役。

基本上膝頭主要會嚴重受傷嘅都係十字韌帶同埋半月板，如果不幸係出現十字韌帶受傷，運動員可能要休養長達1年，咁樣對於運動員黎講真係一個極大嘅打擊。一般黎講，十字韌帶係非常強韌的，但如果好似打籃球咁大量急停或遭受強力撞擊，咁樣前十字韌帶就會好容易受傷甚至撕裂。如果運動時突然聽到膝頭出現類似斷裂嘅聲迫，並且你感覺到該處出現劇烈疼痛，咁樣相信就係你嘅前十字韌帶受傷啦。當十字韌帶受傷，膝頭已經唔再可以支撐你身體嘅重量，手術亦都成為康復嘅最好選擇。

要避免膝頭出現嚴重受傷，平日嘅鍛鍊就變得非常重要啦，加強你膝頭嘅強度同柔軟性，同時要注意自己嘅動作，亦都要減少不必要嘅碰撞。記住，如果想繼續好好咁做運動，就一定要保護好你嘅膝頭啦！