【利迷點睇？】古天奴轉會高普無Say？！

文：MenClub Mr.波特　　圖：互聯網
POSTED ON 16 Aug 2017


尼馬以天價轉投巴黎聖日耳門後，巴塞隆拿獲得一舉巨額資金，但係由於尼馬走後空出黎嘅位置必需盡快填補，所以「地上最強」就四出尋找合適嘅球員，而目前佢地嘅第一目標就係利物浦巴西中場古天奴。

現年24歲嘅古天奴，近年已經慢慢成為利記嘅進攻核心，雖然佢踢嘅位置同作為未必同尼馬完全一樣，但係佢嘅天賦同埋能力卻令巴塞相當有信心。雖然利記領隊高普已多次強調完全無出售古天奴嘅想法，叫巴塞死左條心佢。不過，雖則高普無意賣走古天奴，但係巴塞開出嘅價錢卻令利物浦高層難以拒絕。

據報導指，利物浦高層已經接近同意收受巴塞嘅報價，而古天奴本人目前亦處於停戰狀態，以準備被交易至巴塞。雖然高普極力勸阻利記高層，但係明顯作用不大。高普表示：「舉例黎講，如果有一份有關我地球員嘅報價，而我嘅答案係不同意，但球隊高層卻表示同意，並要求對方開價。然後我再說，我不想接受報價，但高層卻表示想聽下報價，之後佢地開出5000萬鎊，對於佢地黎講5000萬鎊不錯，然後佢地就會將球員賣走，咁樣就係一支球隊嘅運作。」

高普又表示：「咁嘅情況我係多蒙特見過，球隊CEO就曾這樣做，你估當時嘅我會想賣沙軒到皇馬嗎？呢個並唔係我嘅決定，球員有佢地嘅合同，佢地已經同意左。我100％肯定我沒有要求我不能得到嘅野，我亦都尊重呢個遊戲規則。」

「如果球隊高層表示無論對方(巴塞)開出咩價錢我地都唔會接受，咁呢個係一個好明確嘅信息。我地唔想要錢，我地想投資落球隊以獲得一支最好嘅球隊，因為呢個係我地嘅目的同夢想。」

從高普講嘅說話可以得知，佢絕對唔想古天奴離隊，佢想留住球隊表現最好嘅球員，但係佢並無呢個權，只要球隊高層想咩球員都有可能被賣走。雖然萬二分唔願意，但係高普願意接受呢個遊戲規則，並且唔會嘗試去越權。照咁睇古天奴睇黎走嘅機會都真係好大，恐怕利記高層睇到咁大舊錢就唔理球隊實力可能會受影響，然後賣走佢地啦。

其實好似高普咁嘅教練大有人在，佢地對於球員轉會嘅事完全無Say，其中包括車路士領隊干地。不過仍有部份領隊擁有球員轉會嘅絕對話事權，就好似阿仙奴嘅雲加同曼聯嘅摩連奴，而擁有話事權嘅領隊往往可以打造一支自己認為最好嘅球隊，相反好似干地咁就只可以用手頭上嘅球員，就算知道球隊不足嘅地方想進行補強，佢亦都只可以提出要求，球隊並唔一定會去滿足你，所以幾時都話同人唔同命。

消息來源：theworldgame.sbs.com