「巨無霸」O’neal能夠統治現今NBA嗎？

文：MenClub 波特先生　　圖：互聯網
POSTED ON 05 Sep 2017

O’neal被認為係NBA歷史上最具統治力嘅中鋒，無論係身型定係技術，巔峰期嘅佢都係聯盟中鋒當中一等一嘅存在。要知道當時聯盟唔似今日咁大部份球隊都打小球戰術，而係主力仍然以中鋒為主，三分球嘅比例相對低得多。而更甚嘅係，當年擁有人稱四大中鋒嘅存在，除左O’neal之外，就仲有「大夢」Olajuwon、「海軍上將」David Robinson同「大猩猩」Patrick Ewing，但係O’neal就除左喺「大夢」身上拎唔到優勢之外，其他中鋒都完全唔係佢對手。

而O’neal喺2000-2002年為湖人連奪三屆NBA總冠軍，其後又助熱火拎到首座總冠軍，基本上只要O’neal健康，聯盟入面都無乜邊個內線可以阻到呢位「巨無霸」，所以話佢係最具統治力嘅中鋒應該都無乜人會反對。

而對於現今NBA大打小球戰術，有人認為係因為缺少出色中鋒所致，呢一點O’neal亦同意，佢直言現今NBA入面無人能夠阻止到佢，並且認為NBA嘅比賽強度變得越黎越軟。呢個問題，O’neal認為係佢嘅責任，因為當年佢實在太無解，所以唔少人都要求聯盟要改規則，所以慢慢就令比賽強度變得越黎越軟啦。

其實現今NBA仍然有唔少出色嘅內線球員同後起之秀，就好似Anthony Davis、Joel Embiid、Karl-Anthony Towns、DeMarcus Cousins等等，但對於呢班後輩，O’neal就指出好似Davis太過瘦弱，對方根本不可能阻擋到佢。

另外，O’neal又認為就算係現今嘅勇士隊，都唔可以阻止當年佢同Kobe Bryant領軍嘅湖人，因為首先勇士無任何球員可以擋得住佢，如果勇士以Draymond Green作為中鋒去防守佢嘅話，佢一定會將呢位「全能戰士」打爆。除左佢之外，勇士亦無法防守Kobe，無論佢地派Klay Thompson定係Andre Iguodala都難以阻止Kobe得分。相反，Kobe嘅防守能力卻極強，佢單防Thompson絕對無問題，而就算換防Stephen Curry亦難佢唔到。雖然呢兩支唔同年代嘅球隊無可能對上，但係O’neal確實係一個Bug嘅存在。