【有錢有冠軍？】「銀河艦隊」組軍策略改變！

文：MenClub 波特先生　　圖：互聯網
POSTED ON 12 Sep 2017

今年夏天，足球轉會市場可以話陷入極度瘋狂嘅狀態，球星們嘅身價4-5千萬歐元已經變得非常普遍，甚至有啲豪門可以動用1億或2億歐元去收購一名球員，要想奪得冠軍好似就一定要大灑金錢，足球是否真的變為一個純金錢投入嘅運動嗎？

喺轉會市場大量投入金錢，確實可以購入一啲高質嘅球員，從而令球隊實力可以即時提升，所以一眾豪門花大錢買人絕對係無可厚非的。不過，有一支過往花最願意花錢買人嘅豪門今夏卻反其道而行，喺轉會市場收入竟然被投入更多，佢地就係近兩屆歐聯冠軍皇家馬德里。

皇馬過往可以一直話喺金錢足球嘅代表，佢地為左巨星願意花費最多嘅金錢，就好似當年收購施丹、費高、朗拿度、碧咸、C朗拿度、卡卡、占士洛迪古斯、巴利等人嘅時候，總係破盡轉會費紀錄，因此佢地先會獲得「銀河艦隊」嘅稱號。

不過黎到近兩季施丹開始轉任為球隊領隊後，皇馬嘅買人策略撤底改變，好似今夏佢地就只係收購左迪奧靴南迪斯(2400萬歐元)同斯巴路斯(1650萬歐元)，花費就只係4050萬歐元。相反嘅係，皇馬出售或外借嘅所獲得嘅收入就高得多，但係一個莫拉達已經6200萬歐元，另外仲有丹尼洛亦以3000萬歐元賣出，仲有外借占士洛迪古斯亦為皇馬帶黎1300萬歐元嘅收入，計埋其他賣出嘅球員，總計皇馬今夏一共獲得淨收入達到8000萬歐元，呢個情況相信無人會覺得可以出現喺現今一支豪門身上，仲有呢支係「銀河艦隊」皇馬。

如今嘅皇馬唔再貪戀巨星，唔會隨意開出天價買人，相反嘅係佢地會收購具天賦但未真正成名嘅年輕球員(好似阿辛斯奧、華利祖、高華錫)，或以合理嘅價錢收購球隊欠缺嘅球員(好似伊斯高、卡華積、卡斯美路)，同時佢地亦著重青訓，並且曾帶領皇馬預備組嘅施丹亦願意比更多機會呢班隨皇馬成長嘅球員(拿祖、保查美約羅、洛蘭迪)，配合上已有巨星C朗拿度、巴利、卻奧斯、莫迪歷等人，皇馬現有陣容老中青嘅球員都有，實力亦處於足球界頂點，再加上管理層相當信任戰績彪炳嘅施丹，因此皇馬唔再實行收購巨星嘅方案。

喺球員身價大幅上漲下，皇馬反其道而行，佢地打造嘅係一支年輕具活力嘅球隊，佢地唔需要天價巨星加盟，反而係令到球員們好想黎到皇馬，因為喺呢支球隊你將有機會成為巨星。不求外力自己生產巨星嘅同時保留球隊實力，呢一點皇馬真係做得非常好，而當中最大嘅功臣相信非領隊施丹莫屬了。