中國再一次出局，無緣2018俄羅斯世界盃

文：MenClub 波特先生　　圖：互聯網
POSTED ON 07 Sep 2017

昨晚，雖然中國隊成功喺隊長鄭智領紅牌嘅情況下以2：1反勝卡塔爾贏下漂亮一仗，但最終亦只能排名小組第5位，未能打入2018年俄羅斯世界盃決賽週。


2002年日韓世界盃，由於日本及韓國都係主辦國，所以無需打外圍賽就可以直入決賽，因此中國隊當年趁住無左兩支實力強大嘅對手，最終成功獲得亞洲區晉級世界盃決賽週嘅資格，雖然喺決賽週小組賽3戰全敗0入球，但呢一次點都叫做係中國隊首次打入世界盃決賽週。

可惜嘅係，自從2002年呢一次之後，中國隊就再無辦法殺入世界盃決賽週。2016年，中國決定重金禮聘意大利領隊納比帶領國家隊，但就算球迷點樣支持都好，中國隊始料都係打唔出好表現，最終再一次喺世界盃決賽週前止步，連附加賽資格都拎唔到，令13億球迷相當失望。

不過今次中國隊出局都只可以話係佢地實力技不如人，難得可以殺入亞洲區最後12強，佢地首四戰竟然只錄得1和3負，其中更分別不敵可以話喺小組最弱嘅敘利亞及烏茲別克，令球隊早早已陷入不可挽回嘅局面。

由於戰績惡劣，原來嘅主教練亦因此請辭，而中國隊旋風式簽下納比算係值得一讚嘅決定，而其後奇蹟擊敗韓國亦令中國隊帶黎希望。可惜之後表現無以為繼，不敵伊朗令中國基本上令出線只存在數字上嘅可能，最終能夠撐到最後一輪已經算係表現非常好。

作為世界大國之一，中國隊喺世界最受歡迎運動足球上卻落後於唔少其他亞洲國家，而國內中超舉辦得有聲有色，唔少巨星亦曾經加盟，聯賽嘅實力因此大大提高，但卻唔見中國嘅球員有太多出色嘅發揮。究竟係咩原因令中國足球一直咁落後呢？大家點睇？