【泥地王重生】拿度勇奪美網冠軍，穩坐世界第一！

文：MenClub 波特先生　　圖：互聯網
POSTED ON 11 Sep 2017

黎到今年網球壇最後一個大滿貫賽事美國網球公開賽，賽前唔少球迷都期主可以再一次睇到「費拿對決」，但由於費達拿喺背傷影響下早喺8強不敵迪普祖出局後，最終球迷嘅期待遺憾落空，而拿度亦喺狀態大勇下殺入決賽，對手喺首次打入大滿貫決賽嘅28號種子黎自南非嘅安達臣。

面對呢位新面孔，31歲嘅拿度並沒有比對方太多機會，全場控制住戰局，最終以6：3、6：3、6：4直落3盤擊敗對手，取得法網後今年第2個大滿貫，今次亦都係拿度生涯第16個大滿貫冠軍。

奪得今次美網冠軍後，拿度世界排名積分達到9465分，領先排名第二位嘅費達拿將近2000分，將穩坐男單世界排名第一寶座一段時間，而奪得年終世界第一嘅機會亦相當大。

今年網壇剩番嘅主要賽事就只有上海大師賽、巴黎大師賽以及年終總決賽，而費達拿如果能夠有較拿度更出色嘅表現，咁樣佢反超對方重返世界第一亦都係有可能的，所以拿度要想保住年終第一嘅寶座並唔可以100％安心的。

其實睇番拿度近年嘅表現，自從2014拎左生涯第9次法網冠軍之後，就因傷狀態大跌，世界排名曾跌至第10，並喺2015及2016年都無拎到大滿貫冠軍。不過黎到2017年，拿度成功克服傷患，並重拾最佳狀態，佢先喺法網以無敵姿態歷史性第10次封王後，再奪得生涯第3座美網冠軍，同費達拿平分今年嘅4大滿貫。

相信真係唔少球迷都覺得今年網壇真係好似吹起一陣懷舊風，「費拿對決」以為喺2012年費達拿開始狀態下滑之後已經成為絕響，但估唔到幾年好嘅2017年兩位球王可以再次搵番最佳狀態，真係令人敬佩！