【抽唔抽得中？】渣打馬拉松2018報名結果今日公佈啦！

文：MenClub 波特先生　　圖：互聯網
POSTED ON 21 Sep 2017

萬眾矚目一年一度嘅本地盛事 - 渣打馬拉松，今日正式公佈抽籤結果，各位報左名嘅朋友都可以上番渣馬個官方睇下自己究竟有無被幸運之神眷顧抽中參加，就算未被抽中嘅朋友都唔使失望，因為其實你都仲有機會成為後補參加賽事架！

渣馬抽籤結果：請按此

㩒入以上網址之後，各位參加者只需輸入自己嘅電郵地址及出生日期，咁樣你就可以睇到你自己有無被抽中啦。

如果你有幸抽中參加嘅話，咁你就要記住喺9月28日前交齊$350嘅報名費啦，如果唔係你個位就會讓比其他人架啦。之後，你就要留意幾時去拎選手包，預計11月-12月期間你就會收到通知幾時去邊度拎架啦。

如果你唔好彩係抽唔到嘅朋友，你都唔好失望住，因為應該會有唔少朋友喺9月28日前都唔記得交錢或選擇放棄參加的，咁樣大會就會將呢啲空缺再次抽籤，抽籤結果會喺10月6日公佈，所以你都仲有一絲希望可以成為後補入選參加嘅選手架！

而參加嘅朋友，記住你仲有大慨3個月嘅時間進行訓練，記住要量力而為，千祈唔好夾硬跑呀，否則隨時發生意外架。最後提多一提，渣馬嘅比賽日期係2018年1月21日(星期日)，各位參賽者記住Mark實啦。