終於有中文啦！任天堂正式宣布，廣受歡迎嘅Switch大作《薩爾達傳說曠野之息》決定正式推出繁體中文版，預計2018年初發售，而且已入手嘅玩家亦可以齊齊更新繁中版，早買唔使愁！

任天堂香港官方宣布，Switch遊戲《The Legend of Zelda: Breath of the Wild》確認推出繁體中文版及簡體中文版，加入中文字幕，官方中文名稱亦正式確定為《薩爾達傳說 曠野之息》。製作人青沼英二特登錄咗一條片宣布呢項消息，又表示因為需時將內容為香港及台灣嘅玩家本地化，確實發售日期仍然待定，目前只暫定為2018年初，大家畀啲時間佢譯好少少啦。今次現有玩家亦同時有份受惠，屆時可透過更新資料揀返繁體中文或簡體中文，唔使買過新Game。

《薩爾達傳說 曠野之息》自今年3月推出以來，全球銷售量超過390萬，官方話有見一直有玩家聲音表示希望支援中文，所以繼現有嘅9種語言外，決定正式加入中文版，希望大家能以自己喜愛的方式享受遊戲的樂趣，「改變大家一貫對薩爾達的印象」。