【快過GTR！】李宗偉殺球417km/h破世界紀錄！！

文：MenClub 波特先生　　圖：互聯網
POSTED ON 02 Oct 2017

相信唔少人都應該打過羽毛球，對於我地呢啲普通人黎講，平時打羽毛球對方殺波個陣，已經覺得速度好快好難救得到，但如果係由職業羽毛球手黎殺波，你又有無諗過究竟有幾快，威力有幾勁呢？近日，馬來西亞羽毛球好手李宗偉就喺比賽期間打出一記時速達到417公里的殺球，呢個速度已經快過一部以速度見稱嘅GTR！

喺岩岩完結嘅世界羽聯超級系列賽日本公開賽男單決賽中，現年34歲李宗偉面對只有23歲嘅丹麥好手Axelsen，但由於體能不足下，最終以總局數1：2不敵對手，失落賽事冠軍。不過，喺第3局比賽期間，李宗偉卻有一次殺球速度達到417km/h，成功打破由佢自己保持嘅羽毛球比賽最快殺球紀錄。而要知道，喺比賽期間打出咁高速嘅殺球一啲都唔簡單，因為球手需要好好控制球嘅線路，否則用力過度就好容易出界。

2015年香港超級賽，李宗偉曾打出一記408km/h嘅殺球，成功打破世界紀錄，而相隔2年後，這位大馬好手再次刷新自己嘅紀錄，並且一口氣將紀錄打快9km/h，實在係太令人驚訝。

其實羽毛球如果由職業球手全力打出嘅話，殺傷力絕對超乎你想像，以往便有唔同嘅選手示範過利用羽毛球打碎木板或西瓜，其中包括中國好手林丹，所以先祈唔好睇少呢項運動，一個唔小心你個頭真係會被打穿的。