【明知故犯？】「火箭」奧蘇利雲比賽竟著波鞋？！

文：MenClub 波特先生　　圖：互聯網
POSTED ON 19 Oct 2017

相信喺各位朋友嘅眼中，桌球係一種非常紳士嘅運動，因為每一位桌球手喺比賽時都會著起一套整齊服裝，其中包括：長袖純色恤衫、長西褲、背心、煲呔、皮鞋及襪。不過，近日一場比賽就出現有一位選手竟然著起波鞋比賽，而呢位選手更加係為人認識嘅桌球傳奇球手 - 「火箭」奧蘇利雲。

奧蘇利雲呢個大名相信就算對桌球唔係好認識嘅朋友應該都聽過，呢位現年41歲嘅球手曾經係世界第一，其出Q速度極快，因此獲得「火箭」嘅綽號，故此呢位咁有經驗嘅球手無理由唔知桌球比賽嘅服裝規矩。不過，近日「火箭」喺英格蘭桌球公開賽嘅首輪比賽中，竟然著起一對藍色嘅波鞋參賽，因此引起熱烈嘅討論。

據消息指，「火箭」著波鞋嘅原因係因為佢腳部有傷，如果著平常的黑色訓練鞋將會對其傷患有影響，故此才選擇較為舒適的波鞋。不過，賽會對於「火箭」著波鞋並唔滿意，佢地要求「火箭」喺接落黎嘅第二圈賽事必須著番合規格嘅鞋參賽，否則將取消其參賽資格。

對於賽會唔通融，「火箭」表示自己下一圈將會著番合規格嘅黑鞋，但係如果其傷勢並唔容許佢繼續比賽嘅話，佢就會自行退出比賽。

最終如果奧蘇利雲真係退出比賽，相信最失望嘅就係一班Fans了。