【爆大冷！】勇士全場25次失誤，主場不敵活塞！

文：MenClub 波特先生　　圖：互聯網
POSTED ON 30 Oct 2017

開季前，如果同你講活塞可以擊敗勇士，同時佔據東岸第一，你估會有幾多人相信？我諗就算係活塞球迷都真係唔會有呢個信心，因為上季嘅活塞只係得37勝45負嘅戰績，排名東岸第10位，球隊整體實力又屬於中下游，今夏又無巨星加盟，所以理論上佢地嘅表現應該同上季差唔多。

不過黎到新球季，活塞卻令人掉破眼鏡，佢地7戰落黎竟然拎到5勝2負嘅戰績，排名東岸第1位，其中包括佢地今日爆大冷擊敗衝冕總冠軍勇士，真係點估都估唔到。

今日面對勇士，理論上除左勇士最弱嘅中鋒位置，其餘4個位置都應該會被吊打的，但「波永遠係圓的」，比你100％估到就唔係比賽啦。

其實勇士三大攻擊主力Stephen Curry、Kevin Durant及Klay Thompson表現已經相當出色，佢地3人今仗分別取得27分8助攻、28分6籃板及29分，3人合計轟下84分，但係都係不敵活塞，原因其實出喺球隊打得太過隨意，全場竟然出現多達25次失誤，當中Draymond Green有6次、Curry 5次、Thomspon及Zaza Pachulia 4次、KD 3次，還有其他後備球員都相繼出現失誤，失誤足足比活塞多出12次！


本來勇士一直喺前3節領先，但第4節活塞成功迫使勇士多次出現失誤，最終慢慢將分差收窄，其後更逆轉領先，最終以115：107擊倒勇士，其中活塞中鋒Andre Drummond一人就貢獻左5次抄截，另外Stanley Johnson及Avery Bradley則分別交出3次抄截。

如今作為衛冕總冠軍嘅勇士戰績只有4勝3負，只排名西岸第6位，一眾球員狀態並唔穩定，如果想實現衛冕，目前嘅表現真係好難做得到，因此主教練Steve Kerr必須諗下計仔，究竟點樣可以喺季後賽前完成調整，呢個將會係球隊首要目標。