【劍指世界第一】吳安儀奪伊甸女子桌球大師賽冠軍！

文：MenClub 波特先生　　圖：互聯網
POSTED ON 30 Oct 2017

今年越戰越勇嘅香港桌球代表吳安儀，繼較早前奪得英國女子桌球錦標賽冠軍後，近日成功再喺英國勇挫目前女子桌球一姐Reanne Evans奪得WLBS伊甸女子桌球大師賽冠軍，未來越黎越有機會登上世界一姐寶座！

其實目前女子桌球壇都由安儀同Evans玩晒咁濟，基本上兩位都絕對係各大賽事嘅決賽常客，所以兩位球手之前已經多次上演對決，對對方亦都相當熟悉。而今次安儀較Evans早入局，並率先取下第一局，之後雖然被扳回一局，但係安儀又取下第3局而領先2：1。不過，後來Evans發力成功將局數追成3：3，雙方需要進入決勝局黎分勝負。

進入決勝局，Evans首先取得優勢，一口氣領先安儀67度，而此時台面上就只剩低6個紅波，情況相當不妙。其後安儀成功打出38度，將分差收窄至29度，而呢個時候安儀決定「Set士碌架」。安儀Set呢個「士碌架」相當成功，3次令到Evans要罰分，去到第4次雖然Evans成功救到個波，但係就比左機會安儀逆轉呢一局，最終我地香港呢位「四眼Cue后」成功取下第四局，總局數4：3贏下今次賽事冠軍。

不過，賽後Evans一方向大會上訴，佢地認為裁判喺比賽期間計錯分，最終經過覆檢後大會裁定上訴無效，賽果維持原判，安儀確認奪得今次大師賽冠軍！

成功奪得今次賽事冠軍後，安儀喺積分上進一步迫近Evans，佢好大機會喺明年初就會超越對方，首度登上女子桌球世界第一寶座。