「費天王」退出巴黎大師賽，拿度將穩奪年終第一！

文：MenClub 波特先生　　圖：互聯網
POSTED ON 01 Nov 2017

「瑞士天王」費達拿岩岩再次奪得巴素利室內網球賽冠軍，呢次係佢主場第8次捧起賽事冠軍獎盃，而呢個冠軍令佢嘅排名積分方面進一步迫近目前世界一哥拿度，雙方積分差距只有1460分。

不過，正當所有人都期望「費天王」可以進一步追貼拿度，甚至有機會自從2012年以來再次登上世界一哥寶座，呢位網球傳奇卻宣佈會退出黎緊舉行嘅巴黎大師賽，今次呢個決定代表佢直接退出爭奪世界排名第一，拿度只要喺巴黎大師賽贏下一場比賽，咁佢就可以肯定成為年終第一。

費達拿退出爭奪年終第一，相信唔少球迷都相當失望，但係呢個亦都係36歲嘅佢迫於無奈嘅選擇，費達拿表示：「我嘅身體同我講要我休息。巴素利室內網球賽有太多感情元素，我過去6日參加左5場賽事。」

對於退出巴黎大師賽，費達拿亦感到唔好意思，佢已經無參加呢個賽事幾次，但係佢必須保持其身體處於健康，特別係佢嘅著眼點係黎緊倫敦嘅年終賽同埋2018年奧運。

今次退賽其實已經唔係費達拿今年第一次，佢較早前為左準備溫布頓公開賽，將整季嘅泥地賽事全部取消，最終佢亦得償所願獲得冠軍。