【14次奪世界冠軍】最強伐木王者 - Jason Wynyard

文：MenClub 波特先生　　圖：互聯網
POSTED ON 14 Nov 2017

極限運動有分好多種，其中BMX、跳傘、越野電單車應該係大家最熟識的。不過今次要同大家介紹嘅係伐木運動。伐木運動顧名思義就係參賽要要砍伐樹木，並且係要鬥快，而其中岩岩喺挪威舉行嘅斯蒂爾伐木運動(STIHL TIMBERSPORTS®)世界冠軍杯賽係最出名嘅伐木比賽之一。

斯蒂爾伐木運動(STIHL TIMBERSPORTS®)世界冠軍杯賽發源於加拿大、美國、澳洲及新西蘭，喺呢啲地方從事木材業嘅工人將會角逐比賽，其中比賽主要模擬番工人平常嘅工作。當呢項運動進一步成形後，主要係講求參加者嘅運動能力、強度、準繩及力量，比賽內容則包括三個使用斧頭嘅項目及三個使用鋸子嘅項目；跳板，定向劈砍及下手劈砍都係經典嘅三個用斧頭伐木嘅項目；而單向切、台鋸、熱機鋸切則為三個用鋸伐木嘅項目。

最終，今次賽事嘅個人賽冠軍得主為大熱門Jason Wynyard，呢位43歲嘅新西蘭選手以壓倒性嘅實力一路高歌猛進，最終成功衛冕賽事冠軍。今次已經係Wynyard第14次奪得呢個賽事嘅個人賽冠軍，佢奪冠嘅年份分別為：1997-2000、2002、2006、2009-2012、2014-2017年。而澳洲選手Brad De Losa及加拿大選手Mitch Hewitt則分別奪得亞軍及季軍。

另外，喺團體賽方面，過去連續奪得三屆冠軍嘅大熱門澳洲，因為喺八強搶先比賽而受縮短時間處罰，最終爆冷不敵波蘭。而新西蘭隊則喺Wynyard嘅領軍下成功喺決賽擊敗波蘭，相隔4年後再次捧起賽事團體賽冠軍！