【真人版健威】迪基亞撲救反應快全因以前踢前鋒？！

文：MenClub 波特先生　　圖：互聯網
POSTED ON 08 Nov 2017

相信對於唔少球迷黎講，《足球小將》入面嘅著名門將若島津健威應該大家都唔會好陌生，呢位門將喺漫畫後期一度因擁有高度及彈跳力為前提下轉型為前鋒，成為一名「二刀流」球員。而現實入面，原來曼聯門神迪基亞亦有類似嘅經驗，並且正因為呢個經驗先會有佢今日出色嘅撲救能力。

今季目前為止，曼聯暫排名聯賽第二位，總失球數只有5個，係英超20支球隊入面失球最少嘅球隊，當然領隊摩連奴經常泊大巴係原因之一，但係更多嘅係迪基亞救出左唔少險球。今季至今，迪基亞一共為曼聯上陣左15場比賽，其中有11場保持不失球，不失球比率達到73.3%之高！

而究竟迪基亞能夠成為當今世界最佳之一嘅門將係有咩秘訣嘅呢？答案原來係年輕時做過前鋒。

迪基亞日前接受訪問時表示：「在馬德里個陣，我係做前鋒的，其後進入足球學校都係一樣。」

「我經常將兩者結合，去當一名前鋒然後入球。不過，最終我還是覺得自己當門將更好。」

而作為門將，迪基亞較其他門將有更多用腳去救球嘅鏡頭，對此迪基亞表示呢個只係純粹本能反應，並唔係佢要求自己要用腳去救球。而能夠用腳救出咁多球，迪基亞歸功於自己小時候有過唔少入球，因此其用腳嘅感覺不錯。

迪基亞2003年進入馬體會青訓展開訓練，直到2008年與馬體會簽下首份職業球員合同，其後到2009-10球季正式為球隊一隊上陣。2011年夏天，由於雲達沙離開曼聯，領隊費格遜決定重金以1890萬鎊轉會費簽下迪基亞，自此佢就成為曼聯嘅超級門神。