【冠中冠賽】「火箭」關鍵失誤，助攻梅菲奪冠！

文：MenClub 波特先生　　圖：互聯網
POSTED ON 14 Nov 2017

近日喺英格蘭高雲地利舉行嘅桌球冠中冠賽事，決賽戲碼由前世界一哥目前世界排名第7嘅「火箭」奧蘇利雲大戰世界排名第5嘅梅菲。決賽採取19局10勝制，而雙方呢場對決可以話相當緊湊，差啲要打第19局先可以分勝負，但係喺第18局「火箭」打失一隻綠波成為今場比賽勝負嘅轉捩點。

「火箭」曾分別喺2013及2014年連績兩年奪得冠中冠賽嘅冠軍，而去年佢亦成功打入賽事決賽，但卻不敵宿敵希堅斯。今年奧蘇利雲捲土重來，希望三奪呢項賽事嘅冠軍，但係對手並唔惹少，雙方實力非常接近。

而賽事一開始「火箭」就先爭奪人，兩次憑住一Que成功以2：0領先。不過好快梅菲就站穩陣腳，唔再比「火箭」太多機會，一口氣連取4局，以4：2反超前領先。而去到第7局，「火箭」表現出色，以134：0扳回一局。之後幾局，梅菲完全控制大局，一口氣打到局數9：5勝利在望。

作為前一哥，「火箭」又點會咁易放棄，佢咬緊牙關再加上梅菲出錯，成功連取3局，追至8：9。而去到最關鍵嘅第18局，「火箭」一度陷入劣勢落後0：49，但好彩梅菲打紅波時未能入袋，所以「火箭」把握機會打晒台面上嘅紅波從後趕上反超前領先71：49。但關鍵一刻，火箭喺打綠波嘅時候竟然失誤，未能清枱。最終，梅菲把握呢次失誤成功清枱，以74：71逆轉搶下呢一局，以總局數10：8擊敗奧蘇利雲，生涯首次奪得冠中冠賽冠軍！

「火箭」關鍵失誤可由4：50：15開始觀看