今年夏天，巴黎聖日耳門以破紀錄轉會費1.98億鎊從巴塞隆拿簽下尼馬，而呢宗轉會嘅影響力大大左右之後其他球員嘅轉會，因為唔少球隊如今都會以尼馬轉會作為基礎去衡量轉會費。而最新嘅消息指，曼聯領隊摩連奴睇中左皇馬新人王阿辛斯奧，希望可以將佢帶到奧脫福，並且有傳願意為佢開出打破曼聯收購紀錄嘅1.77億鎊轉會費。

如果曼聯真係以1.77億鎊收購阿辛斯奧，咁樣就會打破普巴2016年以8900萬鎊轉會費加入曼聯時嘅球會紀錄。另外，有指摩帥將會為阿辛斯奧開出高達2400萬鎊嘅年薪，咁即係週薪將會高達46.2萬鎊，相比現時佢拎到嘅7.5萬鎊週薪將高出6倍！