【新搞作】意大利、荷蘭明夏仍有機會出戰世界盃？！

文：MenClub 波特先生　　圖：互聯網
POSTED ON 16 Nov 2017

2018年俄羅斯世界盃決賽週32強基本上已經全部決出，目前只係得番秘魯vs紐西蘭嘅最後一場嘅附加賽仲未踢。而經過一番龍爭虎鬥後，幾支世界盃慣常出現嘅球隊都相繼出局，其中包括意大利、荷蘭、美國等，都令唔少球迷都相失望。雖然無得踢世界盃，但係呢幾支傳統勁旅又唔使太失望，因為喺明年世界盃舉行期間有可能會出現另一個「世界盃」！

據報導指，無份參加2018世界盃嘅美國正積極推動喺明年夏天舉行另一個國際賽事，暫且叫佢做「小世界盃」。呢個「小世界盃」將會邀請無份參加世界盃嘅一眾球隊，其中好似意大利、荷蘭、智利、威爾斯、烏克蘭等球隊都係目標之一。

不過，目前為止美國方面嘅構思都好初部，而國際足協(FIFA)都未必願意喺世界盃進行期間(6月14日-7月15日)進行另一個賽事，因為咁樣將好大機會分薄左觀賽人數。

對於球迷黎講，「小世界盃」嘅舉行必定係受歡迎的，因為佢地將可以繼續睇到愛隊比賽，而對於呢啲無辦法參加世界盃決賽週嘅球隊黎講，「小世界盃」將會比佢地一個練兵嘅好機會，為未來作準備。當然，球會方面一定唔會同意「小世界盃」嘅舉行，因為咁樣將會大大增加球隊參賽時受傷嘅可能性，對球隊絕對係害多於利。