【咁大獲？】舒拉寶娃被控涉嫌欺詐，可能面臨7年監禁？

文：MenClub 波特先生　　圖：互聯網
POSTED ON 27 Nov 2017

今年禁賽期終於完結嘅俄羅斯美女網球手舒拉寶娃，雖然喺各項大賽都無成功奪冠，但係狀態卻有明顯提升，其中係美國網球公開賽更打入第4圈，差一啲就可以殺入賽事8強。正以為2017年係舒拉寶娃重新站起來嘅一年，近日卻有傳佢可能因涉嫌欺詐而面臨監禁。

今次舒拉寶娃被牽涉嘅案件，係關於一個喺印度嘅豪宅項目，當時呢個項目公開預售，並表示會喺2016年落成。不過直到今日，呢個豪宅項目郁都無郁過，完全無消息表示會幾時落成或進展程度係點。

對於以上項目難產，有購買者提出控告，直指被發展商誘惑，因為當時該項目被稱為「舒拉寶娃的芭蕾」。而呢位提控嘅人士直指舒拉寶娃都係欺詐嘅共犯，因為佢一直積極公開宣傳該項目，絕對係責無旁貸。

根據印度刑法，如果舒拉寶娃真係被入罪，咁佢最高嘅刑罰將會監禁7年，兼且要被重重罰款。

最令人擔心嘅係，舒拉寶娃喺2013年真係有紀錄係去過印度宣傳有關豪宅項目，呢個絕對係對佢不利嘅證據。究竟舒拉寶娃係咪真係牽涉喺呢宗大型欺詐事件當中呢？下一次聽證會將會喺11月23日舉行，相信事件將會好快水落石出。

現年30歲嘅前世界一姐，曾奪得四大滿貫嘅冠軍(生涯一共奪得5個大滿貫錦標)，其中法網則2次封后，如今嘅佢世界排名第60位。