【米蘭王子回歸？】卡卡將可能重返AC米蘭工作？！

文：MenClub 波特先生　　圖：互聯網
POSTED ON 23 Nov 2017

較早前，巴西傳奇進攻中場卡卡完成自己喺美職聯嘅最後一場比賽，之後佢就無公佈自己未來嘅計劃。而最新消息指，卡卡近期將會重返AC米蘭同球隊商談，未來好大機會返回呢支自己生涯主要效力嘅球隊工作。

卡卡生涯主要喺2003-09年期間效力米蘭，其後又喺2013-14重返米蘭，喺米蘭嘅日子可以話係卡卡生涯最美好嘅時光。卡卡喺2007年奪得過金球獎及世界足球先生，係美斯同C朗拿度統治足球壇個人獎項前最後一名登上最高寶座嘅球員，可以說明當年呢位巴西球員嘅成就有幾大。

有消息指，現年35歲嘅卡卡將會喺今日回到米蘭同球隊高層會面，其後佢就會留低觀看AC米蘭vs奧地利維也納隊嘅歐霸盃賽事。

雖然目前仍然未有定案，但預計卡卡重返米蘭工作應該不成問題，始終佢都係球隊嘅傳奇球員之一，要考慮嘅只係佢將要擔任嘅角色究竟係咩。

當然，卡卡並無正式宣佈自己退役，但係此前佢已經講過自己嘅身體已經難以繼續比賽，每次比賽佢感受到嘅只有疼痛，佢已經唔再享受比賽，因此佢加盟其他球隊繼續球員生涯嘅機會應該好微。