【世界最高訓練】重量級拳王Anthony Joshua杜拜帆船酒店練習！

文：MenClub 波特先生　　圖：互聯網
POSTED ON 24 Nov 2017

近日，世界級拳王Anthony Joshua將自己嘅拳擊訓練帶到一個新高度，就係喺全球知名嘅杜拜帆船酒店上設置擂台並進行訓練。有呢個決定，係因為Joshua希望喺2018年能夠稱霸整個重量級，所以作出呢段宣傳影片，以顯示霸氣！

今次Joshua係計著名哥爾夫球手Tiger Woods及Rory McIlroy，著名網球手Roger Federer及Andre Agassi後，又一位運動員去到帆船酒店展示自己嘅運動才能。不過有別於幾位體壇明星，Joshua今次係喺酒店嘅直升機坪設置左整個擂台，然後同教練完成一套練習。

目前，現年28歲嘅Joshua持有IBF、WBA及IBO嘅重量級世界冠軍腰帶，同時佢嘅生涯20場比賽全勝，並且係全部都係擊倒，實力絕對係強到令人難以置信。因為呢份強大，Joshua已經吸引到另外兩位重量級拳王Deontay Wilder及Joseph Parker嘅關注，後兩位拳王目前都係同Joshua一樣保持生涯全勝。

其中Parker方面已經表示希望能夠喺2018年同Joshua進行對決，不過有關收入嘅分成暫時仲未傾得埋，因此比賽試時仲未能夠成事，相信如果兩大拳王對決，必定會吸引大批拳迷觀看。

Joshua身高6呎6吋，身體肌肉非常勁爆，出拳速度快，力量又強，往往打到對手毫無還擊之力，而由於實力超班，佢喺比賽入面總係無乜受傷嘅機會。而喺成為全職拳手前，Joshua曾喺2012年參加奧運，並成功奪得超重量級拳擊金牌，係較為罕見能夠同時擁有世界拳王腰帶及奧運金牌嘅選手。