【恭喜】C朗拿度五奪金球獎，終追平美斯！

文：MenClub 波特先生　　圖：互聯網
POSTED ON 08 Dec 2017

喺岩岩尋晚舉行嘅一年一度金球獎頒獎典禮上，皇馬球星C朗拿度以大熱門姿態生涯第5度奪得足球界個人最高榮譽金球獎，成功追平其一生宿敵美斯。

與往年一樣，皇馬巨星聯同巴塞巨星美斯一齊去到頒獎禮現場，而今次C朗則喺法國巴黎嘅艾菲爾鐵塔上獲頒是次獎項。而金球獎第二名則為美斯所奪得，第三名則係巴黎聖日耳門巨星尼馬。

除左今次榮獲金球獎，C朗較早前亦成功奪得由法國足球雜誌頒發嘅歐洲最佳球員獎，該獎由173名記者聯合投選出黎的。

喺2017年，C朗嘅個人表現可能無以往咁誇張，但係就非常高效及重要，特別喺歐聯上佢完全係皇馬嘅定海神針，佢喺門前嘅把握力仍然係歷史級別的，最終佢亦成功助球隊衛冕歐聯冠軍，成為歐聯改制後首支衛冕之師。

2008年，C朗首次奪得金球獎，但之後卻被美斯極速從後趕上，呢位阿根廷球星連奪4次金球獎，然後C朗幾經辛苦終於係2013年再次奪回金球獎，然後佢喺過去5年亦4次壓倒美斯獲獎，最終今年終於成功追平美斯，二人生涯同樣5奪金球獎係歷史之冠。

不過黎到今季，雖然C朗喺歐聯賽場上依然保持出色嘅入球能力，但係聯賽嘅表現卻相當低迷，至今只係攻入2球，入球能力大幅下滑下皇馬目前只係排名聯賽第4位，如果進入2018年C朗喺聯賽嘅表現仍然唔能夠有任何提升嘅話，明年嘅金球獎就有好大機會易主了，並且好可能係8年內首次唔係C朗同美斯佔據金球獎頭兩位。