尼奧利奧推薦! 《HUNTER》甲蟲七型電話殼

文：MenClub 魏文青　　
POSTED ON 11 Dec 2017

唔知係咪因為「富奸」又再開始作畫嘅關係，近期《HUNTER X HUNTER》接連推出幾款頗為吸引嘅週邊產品，除咗較早前嘅「貪婪之島」遊戲卡，最新推出嘅就係喺「友克鑫市篇」，由尼奧利奧推薦基路亞同小岡買嘅甲蟲七型電話…殼！

原著作甲蟲七型乃係能夠接通全世界、戶外接收無黑點、可翻譯200種民族語言、可以睇電視兼錄影嘅「高科技」手機，不過喺十幾年後嘅今日一部平價Smartphone基本上都可以做哂以上嘅嘢，唯一嘅差別就係個甲蟲型嘅外表，而由Bandai推出嘅呢個電話殼就可以填補埋呢個不同。對應iPhone 6-8各種型號，不單止有甲蟲嘅外表，而且雙翼可以打開，其中一面仲係鏡(跟返動畫設定)，亦有一個可以收藏獵人執照(或其他卡片)嘅位置。

缺點方面啦喎，就係同原著入面一樣大舊咗啲(最長20cm)。價錢則係4980Yen(約340HKD)，目前於日本Bandai官網接受預訂，預計3月出貨。