李華度：「如果我是現役球員，我將不只贏1個金球獎。」

文：MenClub 波特先生　　圖：互聯網
POSTED ON 21 Dec 2017

黎緊今個週末，西甲將上演萬眾矚目嘅國家打呲：皇家馬德里主場大戰巴塞隆拿，C朗拿度同美斯兩位5屆金球獎得主將再次成為場上嘅主角。不過，就喺呢場大戰前席，巴西名宿兼前巴塞球星李華度則表示，如果自己係現役球員，佢將唔只1次拎到金球獎。言下之意，李華度有信心可以壓倒C朗同美斯拎到金球獎。

李華度直言，現今足球壇已經唔似佢以前踢波時有咁多非常出色嘅球員，所以佢先認為自己可以唔只一次奪得金球獎。

「喺我仲係球員嘅時候，球壇有非常多出色嘅球員，好似我、費高、托迪、迪比亞路....」

「如果我係呢個世代踢波，我將贏得不只1個金球獎。」

「C朗同美斯總係有唔少出色嘅表現，但其他球員則完全沒有機會。」

「佢地兩個喺比賽入面可以攻入好多入球，但呢個指標並唔完全正確，雖然我好鍾意佢兩個，但係好明顯咁樣係西甲產生出黎嘅問題。」

「以往(西甲)只會談論C朗同美斯，尼馬會受到一點點關注，但咁樣就說明宜家無以前有咁多出色嘅球員。」

而對於巴塞應該如果佈陣去面對皇馬，李華度就表示佢地應該選用4-4-2，其中中場應選用布斯基斯、拉傑迪、保連奴及恩尼斯達。如今保連奴喺巴塞嘅表現令唔少人感到意外，對此李華度作為佢嘅同胞亦感到很高興。

現年45歲嘅李華度，職業生涯長達24年(1991-2015)，其中佢喺1997-2002年期間效力巴塞隆拿，並喺1999年奪得金球獎，登上其職業生涯嘅巔峰。而其後喺2002年，李華度又帶領巴西隊奪得世界盃冠軍，令佢成為巴西嘅球王之一。