【不能取替】改變比賽的歐洲步 - Manu Ginobili

文：MenClub 波特先生　　圖：互聯網
POSTED ON 21 Dec 2017

馬刺老將Manu Ginobili今年已經40歲，係目前NBA最老嘅球員之一，但係佢就仍然係銀黑軍團嘅主力之一，並且佢嘅上籃同以往相比可以話差相無幾，對於防守球員黎講仍然係惡夢。

今季Manu場均上陣時間為20.7分鐘，比上季增加左2分鐘，而數據方面佢就可以拎到8.4分2.5助攻2.3籃板，係NBA現役40歲或以上球員表現最好的(不過其實NBA就只係得番3位40歲或以上嘅球員，除左Manu就只有Vince Carter同Jason Terry)。

黎到40歲，體能當然已經無可能同年輕時一樣，但係Ginobili有嘅係爐火純青嘅個人技術，特別係同佢綽號一樣嘅「鬼之切入」，亦即係令人捉摸唔到嘅進攻腳步。

歐洲步係現今NBA一種好常見嘅進攻腳步，好似火箭核心James Harden就係最會運用呢種腳步嘅其中一位球員。不過，講到將歐洲步發揚光大嘅就絕對要數Ginobili啦，而呢一點作為佢嘅隊友，Kawhi Leonard同Danny Green都認為係Manu將歐洲步帶入NBA的。其中Leonard更揚言Ginobili嘅歐洲步改變左比賽。

Ginobili嘅突破能力可以用鬼神莫測黎形容，作為防守者你永遠唔知佢下一步會踏向邊一個方向，再加上佢擁有恐佈嘅傳球能力，同時雙手亦都非常純熟可以攻擊籃框，所以戰至今日佢都仲可以喺球場上咁有威脅，更甚嘅係佢竟然可以令「軍神」Gregg Popovich願意放手比佢喺場上「亂黎」，要知道呢個特權係連Tim Duncan都無，呢一點可以說明「鬼切」嘅魅力究竟有幾大！

未來可能會出一位將歐洲步100％運用嘅球星，但係就應該好難再出一位好似Ginobili呢種隨性的天才啦！