【棄舊迎新】西甲將改例，奪冠不跨年即頒獎！

文：MenClub 波特先生　　圖：互聯網
POSTED ON 04 Jan 2018


改變目的就係令事情變得更好，而西甲官方亦意識到呢一點，所以喺黎緊嘅球季將會修改部份規例，其中最主要嘅就係聯賽冠軍頒發時間。

目前，成功奪得西甲聯賽冠軍嘅球隊，將會喺球隊下一輪主場舉行嘅賽事或下季首個主場賽事中領取冠軍獎盃，呢項規則令唔少人感到難以接受，就好似上季喺最後一輪作客擊敗馬拉加從而奪得聯賽冠軍嘅皇馬，就被迫需要喺今季首個主場賽事中才能領取上季的冠軍獎盃。

對於呢種荒謬嘅做法，首次喺皇馬經歷奪得聯賽冠軍嘅巴利及莫迪歷都感到難以置信，佢地以為西甲會好似英超一樣即使最後一輪作客奪冠亦都可以領取獎盃，但事情卻完全巔覆佢地嘅想法。

汲取其他國家聯賽嘅做法後，西甲官方亦同意改變呢種荒謬嘅領取冠軍獎杯做法，只要球隊確定贏得聯賽冠軍，咁樣冠軍獎杯將會隨即頒發。

除左頒發冠軍獎盃嘅時間進行修改之外，西甲官方亦改變球隊以往嘅對賽情況。一直以黎，西甲球隊嘅對賽都係，如果皇馬喺第一輪主場迎戰巴塞，咁喺第20輪就會作客對番巴塞，但喺新規則下，下半季嘅對賽情況將會完全打散。有咁嘅安排，西甲官方係希望可以避免任何聯賽大戰發生喺歐聯賽事附件，以影響球隊嘅部署。