【立花兄弟？】三大前日本國腳接受遊戲節目挑戰！

文：MenClub 波特先生　　圖：互聯網
POSTED ON 08 Jan 2018


日本嘅遊戲節目出名花樣百出，總係不時會諗到相當好玩同有趣嘅遊戲，而近日其中一個節目就邀請左三位日本傳奇國腳遠藤保仁、小野伸二及中澤佑二接受佢地設計嘅挑戰。

遊戲分三個部份，而最終目標就係將個波頂入移動嘅三輪車尾部。首先開始時會由遠藤保仁大腳斬比身處對面河嘅小野伸二，將球控落黎後，小野伸二就要扭過唔同嘅阻礙，其中包括幾排行人同單車。當扭過晒呢啲阻礙後，佢就要將個波再次斬去河嘅對面比中澤佑二，而中澤佑二就要將個波頂向喺面前走過嘅三輪車尾部位置。

頭兩個部份，遠藤保仁同小野伸二都可以輕鬆完成，但去到最後中澤佑二嘅頭搥就非常困難，佢地經過多次嘗試都係未能將個波頂入目標位置，最接近嘅一次亦以中柱告終，最終挑戰失敗，實在令人可惜。

其實呢位三位前國腳嘅挑戰，就令人諗起《足球小將》入面立花兄弟喺車站月台互相傳球嘅一幕，呢次遊戲可能就係取材於呢度。

而除左今次三位國腳接受挑戰之外，喺之前日本罰球大師中村俊輔亦都曾經接受過挑戰，而佢嘅挑戰就係定點射入一架移動中貨車上嘅一個窗口，最終佢成功完成挑戰，不負罰球王嘅美譽。