【好抵呀！】想同Mayweather玩滾軸溜冰只需75美元！

文：MenClub 波特先生　　圖：互聯網
POSTED ON 10 Jan 2018

如果要數近代最識搵錢嘅運動員，相信「不敗拳王」Floyd Mayweather認第二應該無人敢認第一，有傳佢喺去年8月同McGregor嘅「世紀之戰」入面一共賺到10億美元，而較早前嘅中國之旅又有3000萬美元嘅報酬，可以話想同呢位「拳王」接觸秒秒鐘都係錢！不過各位拳迷今次機會黎啦，因為你可能只需要花費少量金錢就可以同Mayweather有個近距離接觸嘅機會！

之前中國之旅，有傳言話如果想同Mayweather合照，索價講緊都2-3千蚊。而黎緊1月11日，Mayweather團隊就搞左個滾軸溜冰活動，目的係為左宣傳佢喺拉斯維加斯嘅脫衣舞俱樂部，而活動收費就「只係」75美元，咁樣參加者就可以近距離同Mayweather一齊玩滾軸溜冰，時間仲要長達3個鐘，真係超級抵！

喺擂台上，Mayweather就戰無不勝，唔知佢喺滾軸溜冰場嘅實力又係點呢？參加者絕對有機會擊敗呢位不可一世嘅拳王。

其實去年「世紀之戰」後宣佈退休嘅Mayweather，完全無停過落黎，近期一直盛傳佢會加入UFC鐵籠入面進行比賽，而作為賽事嘅發起人之一的White，卻擔心Mayweather雖然可以因此賺到好多錢，但卻有機會被對手打死。

Mayweahter就應該唔擔心自己嘅安危嘅，但睇黎佢不如安安份份，搞下呢啲見面會，玩下滾軸溜冰賺下錢咪幾好，好過比人打到爆晒缸。