Volvo Ocean Race環球帆船賽嘉年華一連15日正式開鑼！

文：MenClub 波特先生　　圖：互聯網
POSTED ON 17 Jan 2018


香港首次作為分站舉辦嘅Volvo Ocean Race環球帆船賽，將一連15日喺啟德跑道公園舉行帆船嘉年華，市民將可以免費入場參觀同埋睇比賽，而現場亦設有唔同嘅展館、攤位及飲食區，適合一家大細黎輕鬆一下。



目前，參加帆船賽嘅各支隊伍已經由澳洲出發，並預計會喺今個星期五(19/1)黎到香港，其後佢地嘅比賽用帆船就會停泊喺啟德跑道公園岸邊，市民將可以近距離欣賞到呢啲罕見嘅大型帆船。另外，7支參加賽事嘅隊伍亦設有各自嘅場館，大家可以對佢地有更深入嘅了解。



而如果你想進一步知道比賽用帆船嘅船艙係點，咁你就要到現場其中一個展館參觀啦，因為個度放置左一部被中間砍開嘅帆船，大家可以走入去親身體驗下一眾船員喺船上嘅生活究竟係點，要知道佢地呢班參加比賽嘅船員，一年入面差唔多有8個月時間係喺佢地嘅船上面生活呢。


而喺另一個場館入面，大家仲可以Check下究竟呢7支隊伍呢一季嘅航海路線同時間係點，值得一試！

另外，今次帆船賽亦致力宣傳對海洋嘅環境保育，其中設置喺現場嘅球體影院The Globe則會播放比賽片段及有關海洋嘅資訊，而飲食區則只提供環保餐具，任何一次性嘅餐具亦都唔建議使用。


值得一提嘅係，各位市民都可以參加絞盤搖把挑戰，以體驗一下船員喺海上面係點樣運用呢啲設備，及體能究竟需求有幾高！

除此之外，現場亦設有一個巨型打八字嘅試車賽道，大會安排左專門嘅司機負責揸車，市民可以安心坐上去體驗一下，再加上喺坐車期間可以帶上VR有另類體驗，真係絕對值得一玩。


而今次大會除左有專車接送市民之外，亦將安排專船由觀塘碼頭及中環碼頭接載市民到嘉年華，各位有興趣嘅朋友就要留意班次啦。