【美斯射失12碼】巴塞0：1不敵愛斯賓奴，29場不敗被終結！

文：MenClub 波特先生　　圖：互聯網
POSTED ON 18 Jan 2018


尋晚西班牙盃8強首回合，巴塞隆拿作客出戰愛斯賓奴，雖然巴塞以71％嘅控球率掌控比賽，而射門亦都比對手愛斯賓奴多，但最終卻以0：1不敵對手，在各項賽事嘅29場不敗紀錄因此而告終。

今仗面對愛斯賓奴，巴塞並未派上最完整嘅陣容，其中蘇亞雷斯、拉傑迪、佐迪艾巴、達史特根等正選都未有正選上陣。雖然係咁，但巴塞嘅實力依然係被外界睇高一線，因為佢地前線上仍然有美斯在陣。

可惜嘅係，只有美斯一人嘅話，對手將較容易對其作出看守，所以巴塞比賽下來真正具威脅嘅射門並唔多。直到下半場61分鐘，巴塞憑住沙治羅拔圖喺禁區入面被撞跌，球證直指12碼。美斯負責主射極刑，對方門將迪亞高盧比斯成功將其撲出，巴塞錯失領先嘅機會。


其後巴塞表現及專注度都開始下滑，戰至比賽最後階段87分鐘，拿華路傳中比奧斯卡美蘭度，後者禁區內射遠柱入網，愛斯賓奴因此以1：0絕殺巴塞。

雖然今仗落敗，但係巴塞喺次回合番到主場仍然有機會反勝晉級的，所以相信巴塞上下仍然無處於非常失望嘅狀態。不過，今仗落敗係巴塞自從開季時喺西班牙超級盃不敵皇馬後各項賽事入面嘅首場落敗，此前佢地已經29場不敗，所以未能達到30場不敗實在有點可惜。