【第20個大滿貫】「瑞士天王」費達拿再奪澳網冠軍！

文：MenClub 波特先生　　圖：互聯網
POSTED ON 29 Jan 2018

曾經，我地以為費達拿會喺2012年奪得溫布頓網球公開賽冠軍之後，因為年齡及身體問題將會慢慢從網球壇退落去，成為歷史入面嘅傳奇人物。不過，黎到今日相信唔少人都跌爛晒啲眼鏡，因為費達拿並無退出網球壇，並且更甚嘅係佢竟然重新掘起，繼上年再次分別奪得澳網及溫布頓之後，今年再一次成功衝冕澳網，取下生涯第20個大滿貫！

現年36歲嘅費達拿，由於拿度因傷喺8強退出比賽，再加上佐高域爆冷出局，所以今次佢澳網決賽嘅對手係世界排名第3位嘅克羅地亞球手施歷。

今次係費達拿生涯第10次面對施歷，而此前9次面對呢位球手，費天王嘅對賽戰績為8勝1負，唯一一次不敵施歷嘅係2014年嘅美國網球公開賽4強，所以心理上費達拿係擁有絕對優勢。

而呢場5盤3勝嘅決賽一開始亦一如想像，費達拿完全壓住施歷黎打，憑住穩定嘅擊球，費達拿先以6：2輕鬆取下第一盤。

去到第二盤，施歷終於發揮佢強勁嘅發球優勢，多次開出Ace球，令費達拿亦有啲招架唔住，不過始終費達拿都係比施歷擁有更多經驗，所以最終佢都成功將呢一盤迫入搶七戰。去到搶七戰，費達拿先聲奪人先以兩個Ace球取下兩分，但係施歷好快企穩陣腳，並發揮出超水準表現，成功搶下第二盤。

去到第三盤，施歷出現唔少無壓力下嘅失誤，因此費達拿乘勝追擊，成功破發下以6：3拎走呢一盤。

去到關鍵嘅第四盤，雖然費達拿一黎就已經發左施歷嘅發球局領先2：0，但係施歷硬緊牙關從後趕上，憑住力量型打法全面壓制費達拿，最終成功以6：3搶下呢一盤，總盤數扳平2：2。

最後一盤，施歷狀態明顯下跌得較為嚴重，被費達拿連取3局，雖然之後憑住發球追番一局，但係費達拿卻還以顏色，以發球成功保住發球局。最後，費達拿再破多施歷一個發球同保住自己嘅發球局下，以6：1贏左第5盤，總盤數3：2擊敗施歷，成功衛冕兼生涯第六次奪得澳網冠軍。而費達拿本人亦相當感觸，因為奪冠無數嘅佢竟然係拎獎盃嘅時候喊起上黎，咁樣可以證明今次奪冠對佢黎講有幾大意義。

今次同時亦都係費達拿生涯第20次奪得大滿貫冠軍，係網球史上嘅第一人。雖然宜家網球一哥仍然係「泥地王」拿度，但相信以費達拿如今嘅狀態，再加上拿度無咁快復出，呢位「瑞士天王」應該可以自2012年11月4日之後，再次登上網球一哥寶座！